शिर्डी: मुंबईतील सोने व्यापारी विजयसिंह वसनाजी खिशी यांना शिर्डीत मोठा गंडा घालण्यात आला आहे. त्यांच्या हॉटेलच्या खोलीतून तब्बल ३ कोटी २६ लाख रुपये किंमतीचे सुमारे साडेतीन किलो सोन्याचे दागिने आणि ४ लाख रुपयांची रोकड चोरीला गेली आहे. या प्रकरणी खिशी यांनी त्यांचा चालक सुरेशकुमार भुरसिंह राजपुरोहित याच्यावर संशय व्यक्त केला असून शिर्डी पोलिसांनी अज्ञात व्यक्तीविरुद्ध गुन्हा दाखल केला आहे.
विजयसिंह खिशी हे मुंबईतील त्यांच्या फर्ममधून सोन्याचे दागिने घेऊन ७ मे रोजी शिर्डीत आले होते. त्यांच्यासोबत कामगार चंद्रप्रकाश प्रजापती आणि चालक सुरेश कुमार होते. त्यांनी हॉटेल साई सुनीतामध्ये खोली क्रमांक २०१ मध्ये मुक्काम केला होता. खिशी हे परिसरातील सराफा दुकानांमध्ये सोने विक्रीसाठी जात असत आणि रात्री हॉटेलमध्ये परत येत.
१३ मे रोजी रात्री जेवणानंतर खिशी त्यांच्या खोलीत झोपले होते. सोन्याच्या दागिन्यांची बॅग बेड आणि टेबलच्या मध्ये ठेवलेली होती आणि खोली आतून बंद होती. मालक आणि दोन्ही कामगार एकाच खोलीत होते.
दुसऱ्या दिवशी, १४ मे रोजी सकाळी ६ वाजता खिशी यांचे चुलत भाऊ शैलेंद्रसिंह पेमेंट घेण्यासाठी हॉटेलवर आले. त्यांनी खोलीचा दरवाजा उघडला असता तो उघडा होता आणि चालक सुरेश कुमार खोलीत नव्हता. त्याचे कपडे आणि मोबाईल खोलीतच होते. हॉटेल आणि परिसरात शोध घेऊनही तो सापडला नाही. त्यानंतर खिशी यांनी बॅग तपासली असता चोरी झाल्याचे उघडकीस आले.
खिशी यांनी पोलिसांना दिलेल्या माहितीनुसार, चालक सुरेश कुमार दोन महिन्यांपासून त्यांच्याकडे कामाला होता आणि त्यांनी त्याच्यावर विश्वास ठेवला होता. सुरेश कुमार चोरी करून मोबाईल आणि कपडे खोलीतच ठेवून फरार झाला आहे.
नगरच्या स्थानिक गुन्हे शाखेचे पथक या प्रकरणाच्या तपासासाठी शिर्डीत दाखल झाले असून त्यांनी हॉटेल परिसरातील सीसीटीव्ही फुटेज, कॉल डिटेल्स आणि इतर माहिती गोळा करण्यास सुरुवात केली आहे. चालक सुरेश कुमारने ही चोरी एकट्याने केली आहे की त्याच्यामागे आणखी कोणाचा हात आहे, याचा तपास शिर्डी पोलीस करत आहेत.
