छत्रपती संभाजीनगर: जमिनीच्या नोंदीतील दुरुस्तीच्या कामासाठी तब्बल तीन लाख रुपयांची लाच मागणाऱ्या अपर तहसीलदारासह दोन खासगी व्यक्तींना लाचलुचपत प्रतिबंधक विभागाने (ACB) बेड्या ठोकल्या आहेत.
अपर तहसीलदार नितीन गर्जे (वय ४५) आणि त्यांचे कथित मध्यस्थ नितीन धुमा चव्हाण (वय ३८) व सोहेल जुबेर बहाशवान (वय २९) अशी आरोपींची नावे आहेत. याप्रकरणी एका ५० वर्षीय तक्रारदाराने एसीबीकडे तक्रार केली होती.
एसीबीचे सापळा अधिकारी वाल्मिक कोरे यांनी दिलेल्या माहितीनुसार, तक्रारदाराच्या मुलाच्या आणि नातेवाईकांच्या मालकीच्या मिटमिटा येथील भूखंडाच्या क्षेत्र दुरुस्तीसंबंधी पाच प्रकरणे डिसेंबर २०२४ पासून अपर तहसीलदार कार्यालयात प्रलंबित होती. तक्रारदार एप्रिल २०२५ मध्ये सुनावणीसाठी हजर झाले असता, निकाल त्यांच्या बाजूने देण्यासाठी अपर तहसीलदार नितीन गर्जे यांच्या सांगण्यावरून खासगी व्यक्ती नितीन चव्हाण याने लाचेची मागणी केली. लाच देण्याची इच्छा नसल्याने तक्रारदाराने १३ मे रोजी एसीबीकडे तक्रार दाखल केली.
तक्रारीची पडताळणी १४ मे रोजी करण्यात आली. त्यावेळी शासकीय पंचांसमक्ष तक्रारदाराने अपर तहसीलदार नितीन गर्जे आणि नितीन चव्हाण यांची भेट घेतली. या भेटीत गर्जे यांनी चव्हाण याला लाच मागण्यास प्रोत्साहन दिल्याचे स्पष्ट झाले. प्रत्येक फाईलसाठी ६० हजार रुपये याप्रमाणे एकूण तीन लाख रुपयांची मागणी करण्यात आली.
१५ मे रोजी एसीबीने सापळ्याची योजना आखली. त्यानुसार, तक्रारदाराने लाचेची रक्कम नितीन चव्हाण याच्या सांगण्यावरून परिसरातील पार्किंगचे काम पाहणाऱ्या सोहेल बहाशवान याच्याकडे सुपूर्द केली. इशारा मिळताच एसीबीच्या पथकाने बहाशवान याला रंगेहाथ पकडले.
या कारवाईनंतर आरोपींच्या घरांची झडती घेण्यात आली. नितीन चव्हाण याच्या अंगझडतीत एक आयफोन, नोकियाचा मोबाईल आणि ७५ हजार रुपये रोख रक्कम मिळाली, तर सोहेल बहाशवान याच्याकडून मोबाईल फोन आणि ६० हजार रुपये जप्त करण्यात आले. सापळा अधिकारी वाल्मीक कोरे आणि सहायक सापळा अधिकारी गोरखनाथ गांगुर्डे यांच्या पथकाने ही यशस्वी कारवाई केली.
