नवी दिल्ली –
संसदरत्न पुरस्कारांमध्ये महाराष्ट्रातील खासदारांनी उत्कृष्ट कामगिरी करत बाजी मारली आहे. राज्यातील तब्बल सात खासदारांना प्रतिष्ठित ‘संसदरत्न’ पुरस्कार जाहीर झाला आहे. यामध्ये राष्ट्रवादी काँग्रेस (शरद पवार) पक्षाच्या खासदार सुप्रिया सुळे आणि शिवसेना (ठाकरे गट) खासदार अरविंद सावंत यांच्यासह सात जणांचा समावेश आहे.
भारताचे माजी राष्ट्रपती डॉ. ए. पी. जे. अब्दुल कलाम यांच्या शैक्षणिक कार्यापासून प्रेरणा घेत, उत्कृष्ट संसद सदस्यांचा सन्मान करण्यासाठी 2010 मध्ये ‘संसदरत्न’ पुरस्काराची घोषणा करण्यात आली.
या पुरस्कारासाठी खासदारांच्या वर्षभराच्या कामगिरीचे मूल्यांकन करण्यासाठी एक विशेष समिती गठित केली जाते. संसदेच्या तीनही अधिवेशनांमधील खासदारांचा सहभाग, विचारलेले प्रश्न आणि एकूण सक्रियता यांसारख्या विविध निकषांवर आधारित ही निवड प्रक्रिया पार पडते. संसद सदस्यांच्या कार्याचा डेटा आणि चर्चेतील सहभाग यांसारख्या महत्त्वपूर्ण बाबी तपासल्या जातात.
विशेष म्हणजे, ‘संसदरत्न’ पुरस्कार हे सरकारतर्फे नव्हे, तर चेन्नईस्थित प्राइम पॉईंट फाऊंडेशन आणि ई-मॅगझिन यांच्या संयुक्त विद्यमाने प्रदान केले जातात. या पुरस्कार निवड समितीमध्ये अनुभवी संसद सदस्य आणि विविध क्षेत्रातील तज्ज्ञांचा समावेश असतो.
यावर्षी संसदरत्न पुरस्कार प्राप्त करणारे महाराष्ट्रातील खासदार पुढीलप्रमाणे:
* सुप्रिया सुळे: खासदार, राष्ट्रवादी काँग्रेस (शरद पवार)
* अरविंद सावंत: खासदार, शिवसेना (ठाकरे गट)
* वर्षा गायकवाड: खासदार, काँग्रेस
* नरेश म्हस्के: खासदार, शिवसेना (शिंदे गट)
* श्रीरंग बारणे: खासदार, शिवसेना (शिंदे गट)
* स्मिता वाघ: खासदार, भारतीय जनता पार्टी
* मेधा कुलकर्णी: राज्यसभा सदस्य, भारतीय जनता पार्टी
