शिर्डी:
शिर्डीतून चोरी झालेल्या २ कोटी ५० लाख ५९ हजार १०३ रुपये किमतीचे, २ किलो ६८७ ग्रॅम वजनाचे सोन्याचे दागिने स्थानिक गुन्हे शाखेने जप्त केले आहेत. मात्र, या प्रकरणातील मुख्य आरोपी अद्याप फरार असल्याची माहिती स्थानिक गुन्हे शाखेचे पोलीस निरीक्षक दिनेश आहेर यांनी दिली आहे.
गुजरात राज्यातील बनासकाटा येथील सोने व्यापारी विजयसिंह वसनाजी खिशी (वय ३५) हे होलसेल सोन्याचा व्यवसाय करतात. १३ मे २०२५ रोजी ते आपला ड्रायव्हर सुरेशकुमार भुरसिंह राजपुरोहित (रा. चौहटन, जि. बारमेर, राजस्थान) याच्यासोबत शिर्डी येथील हॉटेल साई सुनीता येथे मुक्कामी होते. याच रात्री ड्रायव्हरने ३ कोटी २६ लाख रुपये किमतीचे दागिने आणि रोख रक्कम चोरून नेले. याबाबत शिर्डी पोलीस ठाण्यात गुन्हा दाखल करण्यात आला होता.
घटनेची माहिती मिळताच तत्कालीन पोलीस अधीक्षक राकेश ओला यांनी स्थानिक गुन्हे शाखेला तपासाचे निर्देश दिले. त्यानुसार, पोलीस निरीक्षक दिनेश आहेर यांच्या नेतृत्वाखाली उपनिरीक्षक तुषार धाकराव, पोलीस अंमलदार बापुसाहेब फोलाणे, संतोष लोढे, अरुण गांगुर्डे, किशोर शिरसाठ, अमृत आढाव, फुरकान शेख, प्रशांत राठोड आणि चंद्रकांत कुसळकर यांच्या पथकाने तपास सुरू केला.
पथकाने घटनास्थळावरील सीसीटीव्ही फुटेज आणि तांत्रिक विश्लेषणाच्या आधारे आरोपीचा पुणे आणि मुंबईत शोध घेतला. आरोपी मूळ गावी राजस्थानमधील इब्रे का ताला, ता. चोहटन, जि. बारमेर येथे गेल्याचे निष्पन्न झाल्यानंतर पथकाने तेथे धाव घेतली. मात्र, आरोपी सुरेशकुमार राजपुरोहित हाती लागला नाही.
पोलिसांनी आरोपीच्या नातेवाईकांना विश्वासात घेऊन गुन्ह्याचे गांभीर्य समजावून सांगितले. २३ मे रोजी आरोपीचा भाऊ रमेशकुमार भुरसिंह राजपुरोहित (वय ३३) स्थानिक गुन्हे शाखेत हजर झाला आणि त्याने गुन्ह्यातील मुद्देमाल हजर करत असल्याची माहिती दिली. त्याने दिलेल्या माहितीनुसार, आरोपी सुरेशकुमारने २१ मे रोजी शिर्डीतून चोरलेले सोन्याचे दागिने बॅगेतून घरी आणून ठेवले होते आणि त्यानंतर तो कुठेतरी निघून गेला.
रमेशकुमार राजपुरोहित याने हजर केलेले २ कोटी ५० लाख ५९ हजार १०३ रुपये किमतीचे, २ किलो ६८७.३६१ ग्रॅम वजनाचे विविध प्रकारचे सोन्याचे दागिने (एसएनपी नग, टॉप्स, डुल, बाळी, मंगळसूत्र वाट्या, लेडीज रिंग, राजमुद्रा रिंग) जप्त करण्यात आले. जप्त केलेला मुद्देमाल शिर्डी पोलीस ठाण्यात हजर करण्यात आला असून, पुढील तपास शिर्डी पोलीस करत आहेत.
