नाशिक-पुणे महामार्गावरील प्रलंबित कामांना नितीन गडकरींकडून मंजुरी; आमदार अमोल खताळ यांच्या प्रयत्नांना यश

संगमनेर – 

नाशिक-पुणे राष्ट्रीय महामार्गावरील अनेक वर्षांपासून प्रलंबित असलेली आणि अपघातप्रवण ठिकाणांवरील कामे मार्गी लागणार आहेत. आमदार अमोल खताळ यांनी केलेल्या पाठपुराव्यानंतर केंद्रीय रस्ते वाहतूक व महामार्ग मंत्री नितीन गडकरी यांनी या कामांना तात्काळ मंजुरी देत, संबंधित विभागांना कार्यवाही करण्याचे निर्देश दिले आहेत.

चंदनापुरी येथील प्रमोद राहाणे, रामभाऊ राहाणे आणि अंकुश राहाणे यांनी नाशिक-पुणे महामार्गावरील अपूर्ण व अपघातप्रवण ठिकाणच्या कामांना मंजुरी मिळावी, अशी मागणी आमदार अमोल खताळ यांच्याकडे केली होती. या मागणीची दखल घेत आमदार खताळ यांनी केंद्रीय मंत्री नितीन गडकरी लोणी येथे मंत्री राधाकृष्ण विखे पाटील यांच्या निवासस्थानी आले असता, त्यांना प्रत्यक्ष भेटून याबाबत पत्र दिले होते. त्यांच्या या मागणीला सकारात्मक प्रतिसाद देत, मंत्री गडकरी यांनी तातडीने कार्यवाही करण्याच्या सूचना दिल्या आहेत.

मंजूर झालेल्या प्रमुख कामांमध्ये खालील बाबींचा समावेश आहे:

* आनंदवाडी ते जावळेवस्ती (CH 132/112 ते CH 134/100) या दरम्यान सर्व्हिस रोड (LHS बाजू) पूर्ण करणे.

* चंदनापुरी घाटाजवळ नवीन व्हेईकल अंडरपास (CH 132/500) उभारणे.

* बॉक्स कल्व्हर्ट (CH 135/000) च्या दोन्ही बाजूंनी अप्रोच रोडसाठी भूसंपादन करणे.

या कामांमुळे नाशिक-पुणे महामार्गावरील वाहतूक अधिक सुरक्षित आणि वेगवान होण्यास मदत होणार आहे. स्थानिक नागरिकांची ही दीर्घकाळापासूनची मागणी होती, यासाठी आ. खताळ यांनी प्रयत्न केले असल्याचे त्यांच्या प्रसिद्धी विभागाकडून सांगण्यात आले आहे.

या निर्णयामुळे आनंदवाडी ते जावळेवस्ती दरम्यानच्या सर्व्हिस रोडचे काम, चंदनापुरी घाटाजवळच्या नवीन व्हेईकल अंडरपासचे बांधकाम, तसेच बॉक्स कल्व्हर्टसाठी आवश्यक भूसंपादनाची प्रक्रिया लवकरच सुरू होईल.

आमदार खताळ यांनी प्रतिक्रिया देताना सांगितले की, महायुतीच्या स्थानिक पदाधिकाऱ्यांनी हा महत्त्वाचा प्रश्न माझ्या निदर्शनास आणून दिला होता. मी हा विषय तातडीने मांडला आणि नितीन गडकरी साहेबांनी त्याची तात्काळ दखल घेत संबंधित विभागाला कारवाईचे निर्देश दिले. या कामांमुळे संपूर्ण मतदारसंघात रस्ते अधिक सुरळीत आणि सुरक्षित होतील, याचा मला आनंद आहे.