संगमनेरमधील आशीर्वाद पतसंस्थेसमोर आयोजित कार्यक्रमात बोलताना थोरात म्हणाले की, अहिल्यादेवींचे सामाजिक, धार्मिक आणि राजकीय क्षेत्रातील योगदान अतुलनीय आहे. त्यांनी सर्व जातीधर्माच्या लोकांना सोबत घेऊन काम केले. विशेषतः, पाण्याचे महत्त्व ओळखून जलव्यवस्थापनात त्यांनी मोठी क्रांती घडवली, ज्यामुळे त्या खऱ्या अर्थाने आदर्श राज्यकर्त्या ठरल्या.
अहिल्यादेवी होळकर यांचा संगमनेरशीही मोठा संबंध आहे. त्यांनी संगमनेरमध्ये अनेक मंदिरे आणि बारवांची निर्मिती केली. तसेच, संगमनेरचे प्रसिद्ध कवी अनंत फंदी यांना त्यांनी राजाश्रय दिला होता. त्यांच्या समतेचा विचार पुढे नेण्यासाठी ३०० व्या जयंतीनिमित्त आणि विविध महापुरुषांच्या जयंतीनिमित्ताने वर्षभरात विविध वैचारिक कार्यक्रम आयोजित करण्यात येणार असल्याचे बाळासाहेब थोरात यांनी सांगितले.
