पुणे –
पुणे महानगरपालिकेतील एका महिला वैद्यकीय अधिकाऱ्याला मानसिक त्रास देऊन सातत्याने छळ केल्याच्या आरोपानंतर भारतीय जनता पार्टी (भाजप) कामगार आघाडीचे पुणे शहराध्यक्ष ओंकार कदम आणि त्यांचे सहकारी अक्षय कांबळे यांना पुणे महापालिकेत प्रवेशबंदी घालण्यात आली आहे. महापालिका आयुक्त नवल किशोर राम यांनी यासंदर्भात आदेश जारी केले आहेत, ज्यामुळे हे प्रकरण राजकीय आणि प्रशासकीय वर्तुळात चर्चेचा विषय बनले आहे.
संबंधित महिला अधिकाऱ्याने केलेल्या आरोपानुसार, गेल्या पाच महिन्यांपासून ओंकार कदम आणि त्यांच्या सहकाऱ्यांकडून तिला सातत्याने त्रास दिला जात होता. यामध्ये जबरदस्तीने तिच्या दालनात प्रवेश करून छायाचित्रण करणे, दरवाजा बंद करून दमदाटी करणे, आणि अपमानास्पद भाषा वापरणे अशा घटनांचा समावेश आहे. विशेष म्हणजे, यासंदर्भात यापूर्वी तक्रारी करूनही भाजप नेत्यांकडून कोणतीही दखल घेण्यात आली नव्हती, असेही महिला अधिकाऱ्याने नमूद केले आहे.
या सततच्या छळाला कंटाळून पीडित महिला अधिकाऱ्याने थेट राज्य महिला आयोगाकडे तक्रार दाखल केली आहे. त्याचबरोबर, तिने पुणे महापालिकेच्या अंतर्गत तक्रार समितीकडेही धाव घेतली होती. महापालिकेने दिलेल्या माहितीनुसार, १७ फेब्रुवारी २०२५ रोजी काही कार्यकर्त्यांनी महिला अधिकाऱ्यांच्या कार्यकक्षात घुसून गोंधळ घातल्याची आणि कामाच्या ठिकाणी महिलांचा लैंगिक छळ (प्रतिबंध, प्रतिबंधन व प्रतितोष) कायदा २०१३ अंतर्गत घटना घडल्याची नोंद करण्यात आली आहे.
या तक्रारींची गंभीर दखल घेत महापालिका प्रशासनाने तत्काळ पावले उचलली आहेत. आयुक्त नवल किशोर राम यांनी ओंकार कदम आणि अक्षय कांबळे यांना पुढील आदेशापर्यंत महापालिकेत प्रवेशबंदीचा आदेश दिला आहे. यामुळे महापालिकेत महिला कर्मचाऱ्यांच्या सुरक्षिततेच्या दृष्टीने प्रशासनाने कठोर भूमिका घेतल्याचे स्पष्ट झाले आहे.
दरम्यान, ओंकार कदम यांनी पत्रकार परिषद घेऊन आपल्यावरील सर्व आरोप फेटाळले आहेत. त्यांनी म्हटले आहे की, मी कोणत्याही महिला अधिकाऱ्याला त्रास दिलेला नाही. माहिती अधिकारात विचारलेल्या माहितीमुळेच ही तक्रार करण्यात आली आहे. तसेच, चौकशीत दोषी आढळल्यास आपण पक्षाच्या पदाचा राजीनामा देण्यास तयार असल्याचेही त्यांनी स्पष्ट केले. कदम यांनी आरोग्य विभागातील ‘शहरी गरीब योजना’ या योजनेत सात वर्षांपासून भ्रष्टाचार सुरू असल्याचा आरोप करत, आपण ही माहिती उघडकीस आणत असल्यानेच आपल्याविरोधात तक्रार दाखल केल्याचे म्हटले आहे.
हे प्रकरण आता पुणे शहरात राजकीय आणि प्रशासकीय दृष्ट्या संवेदनशील बनले असून, तक्रारीची चौकशी सुरू आहे. या प्रकरणाचे पुढील घडामोडींवर सर्वांचे लक्ष लागले आहे.
