संगमनेर, प्रतिनिधी –
शहरालगत असणाऱ्या खांडगाव शिवारात प्रवरा नदीपात्रातून बेकायदा वाळू वाहतूक करण्याच्या उद्देशाने सुमारे ४० ब्रास वाळू साठा करणाऱ्या वाळू तस्करांवर आणि पिकअपमधून वाळू वाहतूक करणाऱ्या एका अशा सहा जणांवर संगमनेर शहर पोलीस ठाण्यात गुन्हा दाखल करण्यात आला आहे. दरम्यान वाळू वाहतूक करणारा वाहनचालक कारवाईदरम्यान पळून गेला असल्याची माहिती मिळाली.
तलाठी प्रवीण डहाके यांनी दिलेल्या फिर्यादीवरून संगमनेर शहर पोलीस ठाण्यात शरद कारभारी गुंजाळ, गणेश बालोडे, सुनील बोऱ्हाडे, बबलू सातपुते, लहानु बालोडे, निकुंज सुधीर ढोले या सहा वाळू तस्करांवर गुन्हा दाखल करण्यात आला आहे. प्रशासन या प्रकरणे आता या तस्करांवर नेमकी काय कारवाई करते याकडे लक्ष लागले आहे.
वाळू तस्करी रोखण्यात अपयश आलेल्या महसूल पोलीस या प्रशासना विरोधात संगमनेरचे आमदार अमोल खताळ यांना रस्त्यावर उतरावे लागले होते. आमदार खताळ यांनी काही दिवसांपूर्वी रात्रीच्या वेळी वाळू वाहतूक करणारी दोन वाहने पकडून संबंधितांच्या ताब्यात दिली होती. त्यानंतर प्रशासनाने कारवाईसाठी पावले उचलली असली तरीदेखील शहर आणि तालुक्यातील आढळा, म्हाळुंगी, प्रवरा आणि मुळा या नद्यांच्या नदीपात्रांमधून सर्रासपणे वाळू उपसा सुरूच असल्याचे वारंवार समोर आले. महसूल, स्थानिक पोलीस, श्रीरामपूर पोलीस आणि अहिल्यानगरच्या एलसीबीच्या तस्करांसोबत असलेल्या आर्थिक व्यवहाराची चर्चा सातत्याने होत असते. या कारवाईमुळे ही वाळू तस्करी सुरूच असल्याचे पुन्हा एकदा समोर आले आहे.
तलाठी प्रवीण डहाके यांनी दिलेल्या फिर्यादीत म्हटले आहे की, बुधवारी सायंकाळी सहा ते आठ वाजण्याच्या दरम्यान खांडगाव शिवारात नदीपात्रामध्ये निकुंज सुधीर ढोले हा पीक अप मधून अर्धा ब्रास वाळूची वाहतूक करताना आढळून आला. तसेच शरद कारभारी गुंजाळ, गणेश बालोडे, सुनील बोऱ्हाडे, बबलू सातपुते, लहानु बालोडे, निकुंज सुधीर ढोले यांनी तीन ट्रॅक्टरच्या सहाय्याने ४० ब्रास वाळूची चोरी करून विक्री करण्याच्या उद्देशाने साठा करून ठेवल्याचे निदर्शनास आले. कारवाई मध्ये ५ लाख ३३ हजार ५०० रुपयांचा मुद्देमाल हस्तगत करण्यात आला आहे. पुढील तपास महिला पोलीस हेडकॉन्स्टेबल डुंबरे या करीत आहेत.
