संगमनेर, प्रतिनिधी –
“अभिधान सार्थ हे व्हावे, हिंदुस्थान म्हणुनिया जिवाचे ज्यांनी केले रान, त्याचीच तपस्या हे सिंहासन वंद्य” या ओळींनी सुरू होणारा हिंदू साम्राज्य दिनाचा पवित्र सोहळा राष्ट्रीय स्वयंसेवक संघाच्यावतीने उत्साहात साजरा होणार आहे.
छत्रपती शिवाजी महाराजांच्या पराक्रमाची आठवण करून देणारा आणि हिंदू समाजाला ‘स्वत्वा’ची जाणीव करून देणारा हा प्रेरणादायी दिवस उद्या मंगळवारी (१७ जून) सायंकाळी ७ वाजता, मदन कुलकर्णी सभागृह, दिगंबर गणेश सराफ विद्यालय, घास बाजार, संगमनेर येथे संपन्न होणार आहे.
कार्यक्रमाचे अध्यक्षस्थान ॲड. श्रीकांत गोंगे भूषविणार असून प्रमुख वक्ते म्हणून महेश शेळके सर (महाविद्यालयीन विद्यार्थी प्रमुख, राष्ट्रीय स्वयंसेवक संघ, उत्तर नगर जिल्हा) यांचे मार्गदर्शन होणार आहे.
हिंदवी स्वराज्याच्या स्थापनेसाठी छत्रपती शिवाजी महाराजांनी घेतलेल्या कठोर तपस्येची आणि राष्ट्रासाठी केलेल्या समर्पणाची आठवण करून देणाऱ्या या कार्यक्रमाला सर्व आत्मीय बंधू-भगिनींनी उपस्थित राहून प्रेरणा घ्यावी, असे आवाहन आयोजक राष्ट्रीय स्वयंसेवक संघाचे संघचालक सुभाष पांडुरंग कोथमिरे यांनी केले आहे.
कार्यक्रमात राष्ट्रभक्ती, इतिहास आणि संस्कृती यांचे दर्शन घडवणाऱ्या विचारांचे आदानप्रदान होणार असून नव्या पिढीला आपल्या गौरवशाली परंपरेची ओळख करून देणारा हा उपक्रम समाजमनाला जागृत करणारा ठरणार आहे.
