अहिल्यानगर, प्रतिनिधी:
एका विवाहितेवर घरात घुसून चार नराधमांनी सामूहिक अत्याचार केल्याची संतापजनक घटना बुधवारी (१७ जून) सकाळच्या सुमारास घडली. पीडित विवाहितेवर सध्या जिल्हा शासकीय रुग्णालयात उपचार सुरू असून आरोपींचा शोध घेण्यासाठी पोलीस पथके रवाना झाली आहेत.
मिळालेल्या माहितीनुसार, मंगळवारी मध्यरात्रीच्या सुमारास ही धक्कादायक घटना घडली. पीडितेने बुधवारी सकाळी कोतवाली पोलीस ठाण्यात याप्रकरणी गुन्हा दाखल केला आहे. फिर्यादीनुसार, चार अज्ञात व्यक्तींनी घरात प्रवेश करून विवाहितेवर सामूहिक अत्याचार केला. यातील एका संशयिताने विवाहितेच्या तोंडात कापडी बोळा कोंबला होता. त्यानंतर इतर तिघांनी तिला जीवे मारण्याची धमकी देत सामूहिक अत्याचार केला.
सध्या पीडितेवर जिल्हा शासकीय रुग्णालयात उपचार सुरू आहेत. तिचा जबाब नोंदविण्यात आला असून वैद्यकीय तपासणी अहवालाची प्रतीक्षा आहे. संशयित आरोपी अंदाजे ३० ते ३५ वयोगटातील असून, त्यांनी तोंडाला मास्क बांधलेला होता अशी माहिती आहे.
घटनेची माहिती मिळताच वरिष्ठ पोलीस अधिकाऱ्यांनी तातडीने दखल घेतली आहे. घटनास्थळाला भेट देऊन पोलिसांनी पाहणी केली. परिसरातील सीसीटीव्ही कॅमेऱ्यांचे फुटेज तपासले जात आहे. संशयितांच्या शोधासाठी स्थानिक गुन्हे शाखा आणि पोलिसांची पथके तयार करून रवाना करण्यात आली आहेत.
या प्रकरणी, स्थानिक गुन्हे शाखेचे पोलीस निरीक्षक दिनेश आहेर, कोतवाली पोलीस ठाण्याचे पोलीस निरीक्षक प्रताप दराडे, उपनिरीक्षक राजकुमार शिंदेवाड व तेजस्वी थोरात यांनी घटनेची गंभीर दखल घेतली असून, संशयितांना लवकरच अटक करण्यात येईल असे आश्वासन दिले आहे. या घटनेमुळे शहरात खळबळ उडाली असून नागरिकांकडून संताप व्यक्त होत आहे. पोलीस या प्रकरणाचा सखोल तपास करत आहेत.
