संगमनेर, प्रतिनिधी-
जिल्हा पोलीस प्रमुखांच्या विशेष पथकाने काल, (२० जून) संगमनेर शहरात दोन वेगवेगळ्या ठिकाणी छापे टाकून एकूण ३५ लोकांवर कारवाई केली आहे. पोलीस उपअधीक्षक संतोष खाडे यांच्या नेतृत्वाखाली करण्यात आलेल्या या कारवाईत लाखो रुपयांचा मुद्देमाल जप्त करण्यात आला आहे.
संगमनेरमध्ये थेट पोलीस अधीक्षकांच्या पथकाने केलेल्या या मोठ्या कारवाईनंतर आता संगमनेरमधील अन्य अवैध धंद्यांकडे लक्ष लागले आहे. स्थानिक पोलीस, एलसीबी हे अवैध धंदे बंद करण्यात यश मिळवितात की हे धंदे सुरूच राहतात हे येत्या काही दिवसात स्पष्ट होईल. मात्र पोलीस अधीक्षकांच्या विशेष पथकाने अशा कारवाया करण्याची अपेक्षा व्यक्त होत आहे.
संगमनेर शहर पोलिसांनी दिलेल्या माहितीनुसार, गुरुवारी सायंकाळी पावणे सहा वाजता तेलीखुंट परिसरातील एका पत्र्याच्या खोलीत सुरू असलेल्या मटका अड्ड्यावर छापा टाकला. या कारवाईत मटका पेढी चालकासह २९ जनांवर कारवाई करण्यात आली. छाप्यात पथकाने ७४,६५०/- रुपये रोख रक्कम, विविध प्रकारच्या ९ मोटारसायकली (एकूण किंमत ४,३५,०००/- रुपये), वेगवेगळ्या कंपन्यांचे २२ मोबाईल फोन (एकूण किंमत २,२६,०००/- रुपये) आणि मटका खेळण्याचे साहित्य असा एकूण ७,३५,६५०/- रुपयांचा मुद्देमाल जप्त केला.
या प्रकरणी पोलीस कॉन्स्टेबल आत्माराम पवार यांच्या फिर्यादीवरून संगमनेर शहर पोलीस ठाण्यात महाराष्ट्र जुगार प्रतिबंधक कायदा कलम १२ (अ) नुसार गुन्हा (गु.र.नं. ५६७/२०२५) दाखल करण्यात आला आहे. पुढील तपास पोलीस निरीक्षक रवींद्र देशमुख यांच्याकडे सोपविण्यात आला आहे.
पथकाने दुसरा छापा सायंकाळी साडेसहा वाजण्याच्या सुमारास कोल्हेवाडी रस्त्यावर एका उघड्या जागेत सुरू असलेल्या मटका अड्ड्यावर टाकला. या कारवाईत पेढी चालकासह सहा जणांविरोधात गुन्हा दाखल करण्यात आला आहे. यात कारवाईत पोलिसांनी ५३,६६०/- रुपये रोख रक्कम, आकडेमोड केलेल्या चिठ्ठ्या, एक बॉल पेन, १,१२,०००/- रुपये किमतीचे ८ मोबाईल फोन आणि १,४५,०००/- रुपये किमतीच्या ३ मोटारसायकली (एक सुझुकी ॲक्सेस १२५, एक सुझुकी बर्गमन आणि एक फेरांझिया इलेक्ट्रिक मोटार सायकल) असा एकूण ३,१०,६६०/- रुपयांचा मुद्देमाल जप्त केला.
या प्रकरणी पोलीस शिपाई संतोष बाचकर यांनी दिलेल्या फिर्यादीवरून संगमनेर शहर पोलीस ठाण्यात महाराष्ट्र जुगार प्रतिबंधक कायदा कलम १२ (अ) नुसार गुन्हा (गु.र.नं. ५६६/२०२५) दाखल करण्यात आला आहे. पुढील तपास पोलीस उपनिरीक्षक समीर अभंग करत आहे.
उपविभागीय पोलीस अधिकारी संतोष खाडे, पोलीस निरीक्षक वाघ, पोलीस निरीक्षक देशमुख, पोलीस उपनिरीक्षक समीर अभंग या कारवाई वेळी उपस्थित होते. 
