महाराष्ट्र संवाद न्यूज –
‘नीट’ परीक्षेची तयारी करणाऱ्या एका 17 वर्षीय विद्यार्थिनीचा लैंगिक छळ केल्याप्रकरणी दोन शिक्षकांविरुद्ध बीडच्या शिवाजीनगर पोलिस ठाण्यात ‘पोस्को’ (POCSO) कायद्यांतर्गत गुन्हा दाखल करण्यात आला आहे. या घटनेने शिक्षण क्षेत्रात मोठी खळबळ उडाली आहे.
विजय पवार आणि प्रशांत खाटोकर अशी या दोन शिक्षकांची नावे असून, ते दोघे बीड शहरात खासगी कोचिंग क्लासेस चालवतात. विद्यार्थिनीच्या तक्रारीनुसार, प्रशांत खाटोकर (फिजिक्स शिकवणारे) हे तिला क्लास संपल्यावर केबिनमध्ये एकटे बोलावून तिचे चुंबन घ्यायचे आणि तिच्या छातीला व गुप्तांगाला चुकीच्या पद्धतीने स्पर्श करायचे. इतकंच नाही, तर ते तिचे कपडे काढायला लावून फोटोही काढायचे. क्लासरूममध्ये कोणी नसतानाही ते तिच्यासोबत असेच गैरवर्तन करायचे. “जर तू कोणाला सांगितले, तर मी तुला मारून टाकेन,” अशी धमकीही त्यांनी दिल्याचे तक्रारीत म्हटले आहे.
या छळाला कंटाळून पीडित मुलीने दुसरे शिक्षक, विजय पवार यांची मदत मागितली. मात्र, त्यांनी मदत करण्याऐवजी उलट “आम्हीच त्यांना मुलींना त्रास देण्यासाठी ठेवले आहे,” असे म्हणत स्वतःही तिच्यासोबत गैरवर्तन करण्यास सुरुवात केली. तेही तिला केबिनमध्ये एकटे बोलावून तिच्यासोबत गैरवर्तन करायचे. यामुळे इतर विद्यार्थीही तिच्याकडे वाईट नजरेने पाहू लागले, यामुळे तिला खूप त्रास होत होता.
या प्रकाराबाबत तिने तिच्या मैत्रिणीला सांगितले असता, तिने “ते आपले सर आहेत, आपण त्यांचा आदर करायला हवा,” असे म्हणून या घटनेकडे दुर्लक्ष करायला सांगितले. मात्र, शिक्षकांकडून होणारा त्रास असह्य झाल्याने, अखेरीस तिने हा संपूर्ण प्रकार आपल्या आई-वडिलांना सांगितला.
मुलीने दिलेल्या तक्रारीनुसार, तिने एप्रिल 2024 मध्ये उमा किरण कोचिंग क्लासेसमध्ये नीटच्या क्लासेससाठी प्रवेश घेतला होता. जुलै 2024 पासून प्रशांत खाटोकर सर अभ्यासिकेतून बाहेर पडताना तिचा पाठलाग करायचे आणि तिला गाडीवरून सोबत येण्यास सांगायचे.
पीडितेने आई-वडिलांसह शिवाजीनगर पोलिस ठाण्यात धाव घेत तक्रार दाखल केली, त्यानंतर दोन्ही शिक्षकांवर गुन्हा नोंदवण्यात आला आहे. या घटनेनंतर दोघेही शिक्षक फरार असून पोलिस त्यांचा शोध घेत आहेत आणि पुढील तपास करत आहेत.
