संगमनेर, प्रतिनिधी –
शिक्षकाकडून लाच स्वीकारताना संस्थेच्या एका वरिष्ठ पदाधिकाऱ्यांसह लेखनिक संगमनेरमध्ये नासिक एसीबीच्या जाळ्यात सापडला आहे. एसीबीच्या या कारवाईमुळे शैक्षणिक क्षेत्रात मोठे खळबळ उडाली आहे.
शुक्रवारी झालेल्या या कारवाई संदर्भात शनिवारी मध्यरात्री उशिराने संगमनेर शहर पोलीस ठाण्यात बाबूराव राजाराम गवांदे (वय ७५, सेवानिवृत्त शिक्षक व संस्थेचे सहसेक्रेटरी) आणि चंद्रभान काशिनाथ मटकुळे (वय ६२, लेखनिक) या दोघांवर भ्रष्टाचार प्रतिबंधक कायद्यांतर्गत गुन्हा दाखल करण्यात आला आहे. एसीबीने शहरातील सह्याद्री बहुजन विद्या प्रसारक समाज संस्थेच्या कार्यालयात शुक्रवारी (२७ जून) सायंकाळी चार वाजता कारवाई केली होती. त्यानंतर मध्यरात्री ३.४८ वाजता संगमनेर शहर पोलीस ठाण्यात गुन्हा रजिस्टर नंबर ५९३/२०२५ नुसार नोंदवण्यात आला.
संस्थेमध्ये शासनातर्फे नियुक्त झालेल्या एका शिक्षकाच्या भविष्यातील पगारवाढीमध्ये कोणताही अडथळा येणार नाही यासाठी आरोपींनी त्यांच्याकडे ३ लाख रुपयांची लाच मागितली होती. वाटाघाटीनंतर ही रक्कम २ लाख रुपयांवर निश्चित झाली. याच रकमेपैकी पहिला हप्ता म्हणून ५०,०००/- रुपये स्वीकारताना एसीबीच्या पथकाने सापळा रचून दोन्ही आरोपींना पकडले.
या गुन्ह्याचा पुढील तपास नाशिक विभागाचे पोलीस उपअधीक्षक एकनाथ पाटील करत आहेत.
