संगमनेर तालुक्यात दररोज तब्बल 'इतक्या' लाख दुधाचे उत्पादन; दूध व्यवसायात महिलांचे मोठे योगदान: माजी मंत्री थोरात यांचे प्रतिपादन

संगमनेर तालुक्यात दररोज तब्बल ‘इतक्या’ लाख दुधाचे उत्पादन; दूध व्यवसायात महिलांचे मोठे योगदान: माजी मंत्री थोरात यांचे प्रतिपादन

विकासात दुग्ध व्यवसायाने ग्रामीण अर्थव्यवस्थेला मोठा आधार दिला असून संगमनेर तालुक्यात दररोज सुमारे ९ लाख लिटर दुधाचे उत्पादन होते.

संगमनेर, प्रतिनिधी:

संगमनेर तालुका हा एकेकाळी दुष्काळी होता, पण आज तो आपल्या विकासकामांच्या जोरावर राज्यात ओळखला जातो. या विकासात दुग्ध व्यवसायाने ग्रामीण अर्थव्यवस्थेला मोठा आधार दिला असून संगमनेर तालुक्यात दररोज सुमारे ९ लाख लिटर दुधाचे उत्पादन होते. या कष्टाच्या व्यवसायात महिलांचे योगदान मोलाचे आहे, असे गौरवोद्गार माजी कृषी व महसूल मंत्री बाळासाहेब थोरात यांनी काढले.

आंबीखालसा येथील मुळेश्वर महिला सहकारी दूध उत्पादक संस्थेच्या २५ व्या रौप्यमहोत्सव सोहळ्याप्रसंगी बोलत होते. या कार्यक्रमाच्या अध्यक्षस्थानी राजहंस दूध संघाचे चेअरमन रणजितसिंह देशमुख होते. व्यासपीठावर थोरात कारखान्याचे व्हाईस चेअरमन पांडुरंग घुले, खांडेश्वर देवस्थानचे अध्यक्ष लहानभाऊ गुंजाळ, मार्केट कमिटीचे सभापती शंकरराव खेमनर, माजी जिल्हा परिषद सदस्य अजय फटांगरे, मारुती देवस्थानचे अध्यक्ष सर्जेराव ढमढेरे, तसेच मुळेश्वर संस्थेच्या चेअरमन अलका ढमढेरे आणि व्हाईस चेअरमन आरिफा शेख उपस्थित होत्या. याप्रसंगी सर्वाधिक दूध उत्पादन करणाऱ्या महिलांचा सत्कार थोरात यांच्या हस्ते करण्यात आला.

थोरात म्हणाले की, सहकारामुळे ग्रामीण भागात आर्थिक समृद्धी आली आहे. राजहंस दूध संघ हा सहकार क्षेत्रातील एक उत्कृष्ट संघ असून, त्यांच्या कार्यामुळेच खासगी दूध संघ शेतकऱ्यांना चांगला भाव देत आहेत.

राजहंस दूध संघाचे चेअरमन रणजितसिंह देशमुख यांनी बाळासाहेब थोरात यांच्या मार्गदर्शनाखाली संघाने शेतकरी आणि दूध उत्पादकांच्या जीवनात आनंद निर्माण केल्याचे सांगितले. दूध संघाने सातत्याने मुरघास आणि एमडीएफ गोठा यांसारख्या नवनवीन योजना राबवल्या असून, या संकल्पना आज राज्यभर मॉडेल म्हणून ओळखल्या जात आहेत. त्यांनी सर्व संस्थांना गुणवत्तापूर्ण दूध उत्पादन करून सहकाराची ही परंपरा जपण्याचे आवाहन केले.

तर सहकारी संस्थांमुळेच संगमनेर तालुक्याचा सहकार पुणे विद्यापीठाच्या अभ्यासक्रमात समाविष्ट झाला, ही तालुक्यासाठी अभिमानाची बाब असल्याचे अजय फटांगरे यांनी नमूद केले.