अहिल्यानगर:
प्रेमाचे नाटक करत, अल्पवयीन मुलीचे (वय १७) फोटो व्हायरल करण्याची धमकी देत तिच्यावर दोन वेळा लैंगिक अत्याचार झाल्याची धक्कादायक घटना समोर आली आहे. पीडित मुलीने सोमवारी (३० जून) पहाटे तोफखाना पोलीस ठाण्यात फिर्याद दिली असून, कर्जत येथील एका अल्पवयीन मुलावर अत्याचार आणि पोक्सो कायद्यांतर्गत गुन्हा दाखल करण्यात आला आहे.
जामखेड तालुक्यातील रहिवासी असलेली पीडित मुलगी कर्जत येथील महाविद्यालयात शिकत असताना, डिसेंबर २०२४ मध्ये तिची व्हॉट्सअ‍ॅपवरून संशयित आरोपीशी ओळख झाली. जानेवारी २०२५ मध्ये त्यांची कर्जत येथील कॅफेमध्ये पहिली भेट झाली. यानंतर मुलाने तिला प्रेमाच्या जाळ्यात ओढण्याचा प्रयत्न केला. सुरुवातीला नकार दिल्यानंतर, पीडिता ‘नीट’ परीक्षेच्या तयारीसाठी अहिल्यानगर येथे आली. याच दरम्यान मुलाने तिला भेटून तिच्यासोबत फोटो काढले.
पुढे जेव्हा पीडितेने त्याच्याशी बोलणे थांबवले, तेव्हा मुलाने तिचे फोटो वडिलांना दाखवण्याची धमकी दिली. या धमक्यांना घाबरून तिने पुन्हा त्याच्याशी बोलण्यास सुरुवात केली. ६ एप्रिल २०२५ रोजी मुलाने तिला दिल्लीगेट, अहिल्यानगर येथून दुचाकीवरून अहिल्यानगर तालुक्यातील एका हॉटेलमध्ये नेले. तिथे तिने विरोध दर्शवूनही, फोटो व्हायरल करण्याची धमकी देत मुलाने तिच्यावर बळजबरीने लैंगिक अत्याचार केला.
या घटनेमुळे घाबरलेल्या पीडितेने भूम (जि. धाराशिव) तालुक्यातील तिच्या मामाच्या गावी आश्रय घेतला. मात्र, १६ मे २०२५ रोजी संशयित मुलगा तिथेही पोहोचला आणि पुन्हा तिच्यावर अत्याचार केला. त्यानंतर मुलाने तिच्या चुलत भावांना फोन करून ‘तुमच्या बहिणीचे आणि माझे प्रेमसंबंध आहेत, मी तिचे फोटो व्हायरल करेन,’ अशी धमकी दिली.
या सर्व प्रकारानंतर पीडित मुलीने तिच्या आई-वडिलांना घडलेला प्रकार सांगितला. सोमवारी पहाटे नातेवाईकांसह तोफखाना पोलीस ठाण्यात येऊन तिने फिर्याद दाखल केली. पोलिसांनी संशयित अल्पवयीन मुलावर गुन्हा दाखल केला असून, पोलीस या प्रकरणाचा तपास करत आहेत.
