महाराष्ट्र संवाद न्यूज:
शिवसेना (उद्धव बाळासाहेब ठाकरे) गटाचे नवनियुक्त नाशिक महानगरप्रमुख सुनील बागुल यांचे खंदे समर्थक मामा राजवाडे यांच्यासह अन्य काही जणांवर गंभीर स्वरूपाचा गुन्हा दाखल करण्यात आला आहे. घरात घुसून तोडफोड करणे, मारहाण करणे, चोरी करणे आणि जीवे मारण्याची धमकी देणे असे आरोप त्यांच्यावर आहेत. या घटनेमुळे नाशिकच्या राजकारणात खळबळ उडाली आहे.
मिळालेल्या माहितीनुसार, आरएसएस समर्थक आणि सराफ व्यावसायिक किशोर उर्फ गजू घोडके यांनी ठाकरे गटाचे उपनेते सुनील बागुल यांच्या गैरव्यवहाराचे आरोप करणारे व्हिडिओ २७ जून रोजी फेसबुकवर अपलोड केले होते. बागुल यांनी समाजसेवेच्या नावाखाली पैशांचा गैरव्यवहार करत कोट्यवधी रुपयांची संपत्ती जमवल्याचा आरोप घोडके यांनी या व्हिडिओतून केला होता आणि ईडी चौकशीची मागणी केली होती.
हा व्हिडिओ व्हायरल झाल्यानंतर, बागुल यांचे समर्थक बाळा पाठक यांनी घोडके यांना व्हिडिओ डिलीट करण्यास सांगितले. त्यानंतर, मामा राजवाडे आणि सागर देशमुख यांनी फोन करून व्हिडिओ हटवण्यासाठी दबाव आणला. ३० जून रोजी संशयित आरोपींनी घोडके यांच्या काठेगल्ली येथील घरात घुसून त्यांना हत्यार आणि विटांनी मारहाण केली.
घरातील लोकांनी आरडाओरड केल्यावर राजवाडे यांनी जीवे मारण्याची धमकी दिली. तसेच, घराची तोडफोड करून ४ लाख रुपयांचे नुकसान केले. याशिवाय, घोडके यांच्या गळ्यातील सोन्याची चेन आणि घरातून १ लाख रुपये चोरून नेल्याची फिर्याद त्यांनी भद्रकाली पोलिसांत दिली आहे.
या प्रकरणी सागर देशमुख, मामा राजवाडे, अमोल पाटील, लखन दोंदे, लखन झुरडया, विलास सनसे आणि त्यांचे वीस साथीदार यांच्यावर गुन्हा दाखल करण्यात आला आहे. पोलिसांनी संशयितांचा शोध सुरू केला असून, या घटनेमुळे नाशिकमधील राजकीय वातावरण तापले आहे. 
