महाराष्ट्र संवाद न्यूज –
महिलांच्या सुरक्षिततेचा प्रश्न पुन्हा ऐरणीवर आला असून, दोन धक्कादायक घटनांनी नागरिकांमध्ये भीतीचे वातावरण निर्माण झाले आहे. पुण्याच्या कोंढवा येथे कुरिअर डिलिव्हरीच्या नावाखाली घरात घुसून एका तरुणीवर बलात्कार झाल्याची घटना उघडकीस आली आहे, तर दुसरीकडे इन्फोसिसच्या हिंजवडी कॅम्पसमध्ये एका महिला कर्मचाऱ्याचा शौचालयात व्हिडिओ काढल्याचा प्रकार समोर आला आहे.
पुण्यातील कोंढवा येथील एका उच्चभ्रू गृहसंकुलात बुधवारी सायंकाळी साडेसात वाजण्याच्या सुमारास एक भयावह घटना घडली. एका २५ वर्षीय तरुणी घरात एकटी असताना, आरोपी कुरिअर देण्याच्या बहाण्याने तिच्या घरी आला. “माझे कुरिअर नाही” असे तरुणीने सांगितल्यावरही, “सही करणे आवश्यक आहे” असे सांगत आरोपीने तिला दरवाजा उघडण्यास भाग पाडले. सेफ्टी डोअर उघडताच, आरोपीने तिच्या चेहऱ्यावर स्प्रे मारून तिला बेशुद्ध केले आणि तिच्यावर बलात्कार केला.
या घटनेची भीषणता इथेच थांबली नाही. बलात्कारानंतर आरोपीने पीडितेचा मोबाईल घेऊन त्यात स्वतःचा एक सेल्फी काढला. त्यानंतर त्याने “मी पुन्हा येईन” असा धमकीवजा संदेश टाईप करून मोबाईलमध्येच ठेवला, ज्यामुळे पीडितेच्या मनात आणखी भीती निर्माण झाली आहे. कोंढवा पोलिसांनी याप्रकरणी आरोपीविरुद्ध गुन्हा दाखल केला असून, परिसरातील सीसीटीव्ही फुटेजच्या आधारे त्याचा शोध सुरू आहे.
इन्फोसिस कॅम्पसमध्ये महिला कर्मचाऱ्याचा शौचालयात व्हिडिओ काढला – दुसरीकडे, प्रसिद्ध आयटी कंपनी इन्फोसिसच्या इलेक्ट्रॉनिक सिटी कॅम्पसमधील एका महिला कर्मचाऱ्याचा शौचालयात व्हिडिओ काढल्याचा धक्कादायक प्रकार समोर आला आहे. ३० जून रोजी घडलेल्या या घटनेत, आपले व्हिडिओ रेकॉर्डिंग केले जात असल्याचे उघडकीस आल्यावर महिलेने तातडीने अलार्म वाजवला. कंपनीचे कर्मचारी धावले आणि त्यांनी आरोपीला पकडले. आरोपीच्या मोबाईलमध्ये वेगवेगळ्या महिलांचे ३० हून अधिक अश्लील व्हिडिओ आढळल्याने एकच खळबळ उडाली आहे. पोलिसांनी आरोपीला अटक केली असून, पुढील तपास सुरू आहे.
या दोन्ही घटनांनी पुणे शहरातील महिलांच्या सुरक्षिततेबद्दल गंभीर प्रश्नचिन्ह निर्माण केले आहे. वाढत्या गुन्हेगारीमुळे महिलांमध्ये असुरक्षिततेची भावना वाढली असून, प्रशासनाने यावर तातडीने कठोर उपाययोजना करण्याची मागणी जोर धरू लागली आहे.
