संगमनेर / अहिल्यानगर, ३ जुलै २०२५:
अहिल्यानगर जिल्हा पोलीस अधीक्षकांच्या आदेशानुसार स्थानिक गुन्हे शाखेने संगमनेर तालुका पोलीस ठाण्याच्या हद्दीत सुरू असलेल्या एका मोठ्या जुगार अड्ड्यावर बुधवारी छापा टाकून तब्बल ११ लाख २४ हजार ६०० रुपयांचा मुद्देमाल जप्त केला आहे. या कारवाईत जुगार खेळणाऱ्या आणि खेळवणाऱ्या १४ आरोपींना ताब्यात घेण्यात आले आहे, अशी माहिती एलसीबीचे पोलीस निरीक्षक दिनेश आहेर यांनी दिली.
पोलीस अधीक्षक सोमनाथ घार्गे यांनी जिल्ह्यातील अवैध धंद्यांवर कारवाई करण्याचे निर्देश स्थानिक गुन्हे शाखेचे पोलीस निरीक्षक दिनेश आहेर यांना दिले होते. त्यानुसार, पोलीस निरीक्षक आहेर यांच्या नेतृत्वाखालील पथके जिल्ह्यात अवैध व्यवसायांवर कारवाया करत आहे. एलसीबीच्या या कारवाईमुळे स्थानिक पोलिसांचे पितळ उघडे पडले आहे.
मिळालेल्या माहितीनुसार, स्थानिक गुन्हे शाखेतील पोलीस अंमलदार बिरप्पा सिध्दप्पा करमल, बाळासाहेब ज्ञानदेव नागरगोजे, अशोक हिरामन लिपणे, आकाश राजेंद्र काळे आणि रमिझराजा रफिक आतार हे संगमनेर शहर परिसरात गस्त घालत असताना, त्यांना तळेगाव ते नादुर शिंगोटे रस्त्यालगत एका बांधकाम सुरू असलेल्या घरात तिरट नावाचा जुगार खेळला जात असल्याची माहिती मिळाली.
पथकाने तात्काळ घटनास्थळी जाऊन खातरजमा केली असता, काही इसम पत्त्यांवर पैसे लावून जुगार खेळत असल्याचे दिसून आले. पोलिसांनी छापा टाकून पहिल्या डावातील अजीज अबु शेख (रा. तळेगाव दिघे), आकाश बाबासाहेब गडाख (रा. पारेगाव बु.), योगेश दत्तात्रय राहटळ (रा. चिंचोली गुरव), भास्कर बाबुराव पगार (रा. चिंचोली गुरव), महेंद्र सुंदरलाल पाटणी (रा. तळेगाव दिघे), कैलास कारभारी मळे (रा. काकडवाडी) आणि नंदु म्हतु पिंगळे (रा. तळेगाव दिघे) या सात जणांना, तर दुसऱ्या डावातील इरफान युनिस शेख (रा. लोणी, हसनापूर), आशिफ कासम शेख (रा. करोले), रविद्र विठ्ठल जेजुरकर (रा. ममदापूर), एकनाथ रोहीदास जोरवेकर (रा. पोरेगाव), विलास भास्कर जगताप (रा. तळेगाव दिघे), दशरथ बिरु कांदळकर (रा. वरझडी बु.) आणि विजय रंभाजी ढवळे (रा. पारेगाव बु.) या सात जणांना असे एकूण १४ आरोपींना ताब्यात घेतले.
ताब्यात घेण्यात आलेल्या आरोपींकडून जुगार खेळण्यासाठी लागणारे साहित्य, रोख रक्कम, १३ मोबाईल फोन आणि ९ मोटारसायकली असा एकूण ११ लाख २४ हजार ६०० रुपयांचा मुद्देमाल जप्त करण्यात आला आहे.
या प्रकरणी पोलीस अंमलदार रमिझराजा रफिक आतार यांच्या फिर्यादीवरून संगमनेर तालुका पोलीस ठाण्यात महाराष्ट्र जुगार कायदा कलम १२ (अ) नुसार गुन्हा दाखल करण्यात आला आहे. पुढील तपास पोलीस करत आहे. ही यशस्वी कारवाई पोलीस अधीक्षक सोमनाथ घार्गे, श्रीरामपूरचे अपर पोलीस अधीक्षक वैभव कलुबर्मे आणि संगमनेरचे उपविभागीय पोलीस अधिकारी कुणाल सोनवणे यांच्या सूचना व मार्गदर्शनाखाली स्थानिक गुन्हे शाखेतील अधिकारी व अंमलदार यांच्या पथकाने केली.
