संगमनेर, प्रतिनिधी:
आज (शुक्रवारी) सकाळी चंदनेश्वर विद्यालयाची स्कूल बस विद्यार्थ्यांना घेऊन येत असताना चंदनापुरी घाटात एकेरी वाहतुकीमुळे साईड गटारात पलटली. या अपघातात चार ते पाच विद्यार्थी जखमी झाले. ही बातमी मिळताच माजी मंत्री बाळासाहेब थोरात यांनी तातडीने आपल्या यंत्रणा व कार्यकर्त्यांना मदतीसाठी सूचना दिल्या. यानंतर थोरात कारखान्याचे संचालक इंद्रजीत थोरात यांनी तातडीने घटनास्थळी आणि नंतर रुग्णालयात जाऊन जखमी विद्यार्थ्यांची विचारपूस केली.
चंदनापुरी घाटातील डॉ. गुंजाळ हॉस्पिटलमध्ये जखमी विद्यार्थ्यांना दाखल करण्यात आले आहे. इंद्रजीत थोरात यांच्यासोबत विजय राहणे, इंद्रजीत खेमनर, सरपंच भाऊराव रहाणे, बाळासाहेब सागर, किरण राहणे, बालमशेठ सरोदे, आनंदराव कढणे, बाळू सरोदे, संदीप सरोदे, दिनकर भालेराव यांच्यासह चंदनापुरी येथील विविध कार्यकर्त्यांनी रुग्णालयात जाऊन विद्यार्थ्यांची चौकशी केली. यावेळी मुख्याध्यापक आणि तालुका पोलीस निरीक्षक देविदास ढुमणे यांच्यासह अनेक मान्यवर उपस्थित होते.
यावेळी इंद्रजीत थोरात यांनी मुख्याध्यापक, सर्व विद्यार्थी आणि पालकांशी संवाद साधून त्यांना दिलासा दिला. ही घटना दुर्दैवी असली तरी जखमी विद्यार्थ्यांवर उपचार सुरू असून, पालकांनी आणि नागरिकांनी घाबरून जाऊ नये, असे आवाहन केले.
