महाराष्ट्र संवाद न्यूज – अहिल्यानगर:
अवैध वाळू उपसा आणि वाहतुकीविरोधात अहिल्यानगरच्या स्थानिक गुन्हे शाखेने श्रीरामपूर तालुक्यात मोठी कारवाई केली आहे. या कारवाईत सुमारे १९,९०,०००/- रुपये किमतीचा मुद्देमाल जप्त करण्यात आला असून, चार आरोपींना ताब्यात घेण्यात आले आहे.
अहिल्यानगरचे पोलीस अधीक्षक सोमनाथ घार्गे यांनी जिल्ह्यातील अवैध धंद्यांवर कारवाई करण्याचे आदेश दिले होते. त्यानुसार, पोलीस निरीक्षक दिनेश आहेर यांच्या नेतृत्वाखाली स्थानिक गुन्हे शाखेचे बाळासाहेब नागरगोजे, अशोक लिपणे, संदीप दरंदले, रणजीत जाधव, आकाश काळे आणि रमीजराजा आत्तार यांच्या पथकाने ही कारवाई केली.
गुरुवारी (३ जुलै) पथकाला गोपनीय माहिती मिळाली की, श्रीरामपूर तालुक्यातील नायगाव शिवारातील गोदावरी नदीपात्रातून दोन व्यक्ती ट्रॅक्टर-ट्रॉलीमधून वाळू उपसा करून तिची वाहतूक करत आहेत. या माहितीच्या आधारे, पथकाने पंचांसह छापा टाकला. त्यावेळी, दोन ट्रॅक्टरमध्ये मजुरांच्या सहाय्याने वाळू भरली जात असताना आढळून आले.
पथकाने तात्काळ कारवाई करत दोन ट्रॅक्टर चालक, करण अशोक वाघ (वय २०, रा. नायगाव, ता. श्रीरामपूर, जि. अहिल्यानगर) आणि अनिल नारायण आमले (वय २४, रा. गोंडेगाव, ता. श्रीरामपूर, जि. अहिल्यानगर) यांना ताब्यात घेतले. तसेच, ट्रॅक्टर मालक दत्तात्रय रावसाहेब भवार (रा. गोंडेगाव, ता. श्रीरामपूर, जि. अहिल्यानगर) आणि आदित्य काकासाहेब दिवे (रा. गोंधवणी वॉर्ड नं. १, श्रीरामपूर, जि. अहिल्यानगर) यांनाही ताब्यात घेण्यात आले.
पथकाने पकडलेल्या ट्रॅक्टर चालकांकडे वाळू वाहतूक आणि उपसा करण्याचा कोणताही परवाना नव्हता. त्यामुळे घटनास्थळावरून दोन ट्रॅक्टर, ट्रॉली आणि दोन मोटरसायकली असा एकूण १९,९०,०००/- रुपये किमतीचा मुद्देमाल जप्त करण्यात आला.
ताब्यात घेतलेल्या आरोपींना मुद्देमालासह श्रीरामपूर तालुका पोलीस स्टेशनमध्ये हजर करण्यात आले. त्यांच्याविरुद्ध श्रीरामपूर तालुका पोलीस स्टेशनमध्ये गुरनं ३५३/२०२५, बीएनएस २०२३ च्या कलम ३०३ (२), ३ (५) वगैरे नुसार गुन्हा दाखल करण्यात आला आहे. या गुन्ह्याचा पुढील तपास श्रीरामपूर तालुका पोलीस करत आहे.
सदरची कारवाई पोलीस अधीक्षक सोमनाथ घार्गे, अपर पोलीस अधीक्षक वैभव कलुबर्मे (श्रीरामपूर) आणि उपविभागीय पोलीस अधिकारी बसवराज शिवपुजे (श्रीरामपूर उपविभाग) यांच्या सूचना व मार्गदर्शनाखाली स्थानिक गुन्हे शाखेच्या पथकाने केली.
