संगमनेर, प्रतिनिधी –
तीन महिन्याच्या कालखंडात एसटी महामंडळाच्या संगमनेर आगारात १० नवीन बसेस (लालपरी) दाखल झाल्या आहेत. यात आज आमदार अमोल खताळ यांच्या हस्ते ५ नवीन बसेसचे पूजन करून लोकार्पण करण्यात आले. यावेळी आमदार खताळ यांनी महायुतीच्या कार्यकर्त्यांसह नव्या एसटी बसमधून शहरातील मुख्य मार्गावरून फेरफटका मारला.
आमदार अमोल खताळ यांनी यावेळी बोलताना, संगमनेर आगारातील एसटी कर्मचारी, चालक, वाहक यांच्या समस्या शासन दरबारी मांडून सोडविल्या जातील असे आश्वासन दिले.
आषाढी एकादशीपूर्वीच नव्या एसटी बसेस प्रवाशांच्या सेवेत दाखल झाल्या आहेत. साडेतीन महिन्यांपूर्वी आमदार खताळ यांच्या पाठपुराव्याने संगमनेर डेपोसाठी १० नव्या बसेस मिळाल्या होत्या. यापैकी ५ बसेस या अगोदरच आगारात दाखल झाल्या होत्या. उर्वरित ५ एसटी बसेसही आता आषाढी एकादशीच्या पार्श्वभूमीवर डेपोला प्राप्त झाल्या आहेत.
या सर्व बसेस मिळाल्याबद्दल आगार व्यवस्थापक प्रशांत गुंड यांनी आमदार अमोल खताळ यांचे आभार मानले. आषाढी वारीच्या पार्श्वभूमीवर या नवीन बसेस प्रवाशांसाठी सोयीस्कर ठरतील, असेही ते म्हणाले.
या लोकार्पण सोहळ्याला शिवसेना तालुकाप्रमुख रामभाऊ रहाणे, शहरप्रमुख विनोद सूर्यवंशी, महिला जिल्हा उपप्रमुख दीपाली वाव्हळ, भाजप शहर अध्यक्ष पायल ताजने, मेघा भगत, उषा कपिले, आरपीआयचे शहराध्यक्ष कैलास कासार, माजी नगरसेवक ज्ञानेश्वर कर्पे, शिरीष मुळे, कैलास वाकचौरे, राष्ट्रवादी काँग्रेसचे जिल्हाध्यक्ष कपिल पवार, ॲड. संग्राम जोंधळे यांच्यासह महायुतीचे कार्यकर्ते आणि संगमनेर आगारातील कर्मचारी मोठ्या संख्येने उपस्थित होते.
कार्यक्रमाचे प्रास्ताविक आगारप्रमुख प्रशांत गुंड यांनी केले, सूत्रसंचालन अजित जाधव यांनी केले तर आभार वाहतूक नियंत्रक गायकवाड यांनी मानले. 
