संगमनेर, प्रतिनिधी:
महायुती सरकारने सुरू केलेल्या घरेलू कामगार योजनेअंतर्गत महिलांना मोफत साहित्य वाटप करण्यात आले. यावेळी आमदार अमोल खताळ यांनी तालुक्यात काही दलालांकडून लाभार्थींची दिशाभूल केली जात असल्याच्या तक्रारींवरून तीव्र नाराजी व्यक्त केली. कोणताही योजनेसाठी पैसे देऊ नका, असे आवाहन करत, पैसे घेऊन लाभार्थींची आणि महायुती सरकारची बदनामी करणाऱ्यांविरोधात फौजदारी गुन्हे दाखल करण्याचा इशारा आमदार खताळ यांनी दिला.
महायुती सरकारने घरेलू कामगार महिलांसाठी सुरू केलेल्या योजनेतील लाभार्थी महिलांना आ. अमोल खताळ यांच्या उपस्थितीत साहित्याचे वितरण करण्यात आले. याप्रसंगी रामभाऊ राहाणे, शिवसेना शहराध्यक्ष विनोद सूर्यवंशी, दिपाली वाव्हळ, आरपीआयचे शहराध्यक्ष कैलास कासार, पायल ताजणे, गुलाब भोसले, श्रीकांत गोमासे, गोकुळ दिघे, रेखा गलांडे यांच्यासह कामगार विभागाचे अधिकारी उपस्थित होते.
आमदार अमोल खताळ यांनी यावेळी बोलताना सांगितले की, महायुती सरकारने सर्वसामान्य माणूस केंद्रीभूत मानून योजनांचे निर्णय घेतले आहेत आणि त्यांची अंमलबजावणी राज्यात यशस्वीपणे सुरू आहे. जिल्ह्याचे पालकमंत्री राधाकृष्ण विखे पाटील यांच्या माध्यमातून या योजना सर्व लाभार्थींपर्यंत पोहोचत आहेत. घरेलू कामगार योजनेसाठी नाव नोंदणी करताना मोफत नोंदणी शिबिराचे आयोजन करण्यात आले होते, परंतु काही दलालांनी महिलांकडून पैसे घेतल्याच्या तक्रारी आल्या आहेत. या तक्रारींच्या चौकशीचे आदेश देण्यात आले असून, अधिवेशन संपल्यानंतर कामगार विभागाच्या अधिकाऱ्यांसमवेत पुढील कार्यवाही केली जाईल, असे खताळ यांनी स्पष्ट केले.
तालुक्यात काही मंडळींकडून महायुती सरकारला बदनाम करण्याचे काम सुरू आहे. लोकांकडून आता माहिती आणि आधार कार्ड नंबर मागितले जात आहेत. कोणालाही आपली व्यक्तिगत माहिती किंवा आधार कार्ड नंबर देऊ नका, असे आवाहन त्यांनी केले. कोणत्याही योजनेसाठी पैसे द्यावे लागत नाहीत. पालकमंत्री कार्यालय तसेच माझे संपर्क कार्यालय जनतेसाठी सुरू असून, लोकांनी स्वतः येऊन योजनेसाठी नोंदणी करावी. शासकीय कार्यालयात कोणी पैसे मागत असेल, तर आमच्याकडे तक्रारी करा, असेही खताळ म्हणाले.
दिव्यांग बांधवांसाठी मोफत शिबिराचे आयोजन- केंद्र शासनाच्या सामाजिक न्याय व अधिकारिता मंत्रालय, भारत सरकार, भारतीय कृत्रिम अंग निर्माण निगम, कानपूर व एस. आर. ट्रस्ट, मध्य प्रदेश, डॉ. विठ्ठलराव विखे पाटील फाऊंडेशन संचलित, जिल्हा दिव्यांग पुनर्वसन केंद्र, जिल्हा दिव्यांग सक्षमीकरण विभाग, अहिल्यानगर आणि विविध दिव्यांग संघटना यांच्या संयुक्त विद्यमाने, एडीप (ADIP) या योजनेंतर्गत घुलेवाडी ग्रामीण रुग्णालय येथे १३ जुलै २०२५ रोजी अस्थिव्यंग प्रवर्गातील दिव्यांग व्यक्तींसाठी मोफत कृत्रिम हात, पाय बसविणे, कॅलिपर्स यांचे मोजमाप व तात्काळ मोफत जागेवर साहित्य वाटप शिबिराचे आयोजन करण्यात आले आहे. या शिबिराचा दिव्यांग बांधवांनी लाभ घ्यावा, असे आवाहन आमदार खताळ यांनी केले आहे.
