मुंबई:
सध्या राज्यात मराठी-अमराठी वादावरून निर्माण झालेल्या तणावाच्या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी पक्षाच्या नेत्यांना आणि कार्यकर्त्यांना कडक आदेश जारी केले आहेत. यापुढे कोणीही त्यांच्या परवानगीशिवाय वृत्तपत्रे, वृत्तवाहिन्या किंवा डिजिटल माध्यमांशी संवाद साधू नये, असे निर्देश त्यांनी दिले आहेत.
राज ठाकरे यांनी आपल्या अधिकृत ‘X’ अकाउंटवरून ही माहिती दिली आहे. या आदेशानुसार, पक्षातील कोणत्याही कार्यकर्त्याने किंवा नेत्याने स्वतःचे व्हिडीओ सोशल मीडियावर टाकू नयेत किंवा व्यक्तिगत प्रतिक्रिया देऊ नयेत. महत्त्वाचे म्हणजे, पक्षाच्या अधिकृत प्रवक्त्यांनाही राज ठाकरे यांच्या पूर्वपरवानगीशिवाय माध्यमांशी बोलण्यास मनाई करण्यात आली आहे.
मीरा भाईंदर येथे मनसे कार्यकर्त्यांकडून एका व्यापाऱ्याला मारहाण केल्याचा व्हिडीओ व्हायरल झाल्यानंतर मराठी भाषेच्या मुद्द्यावरून राज्यात वाद अधिकच वाढला होता. या घटनेनंतर मनसे आणि भाजपच्या काही नेत्यांमध्ये शाब्दिक चकमकीही झाल्या होत्या.
या पार्श्वभूमीवर राज ठाकरे यांनी पक्षाला शिस्त लावण्यासाठी आणि गैरसमज टाळण्यासाठी हे कठोर पाऊल उचलल्याचे बोलले जात आहे. यापूर्वी ५ जुलै रोजी वरळीतील मेळाव्यातही राज ठाकरे यांनी कार्यकर्त्यांना मारहाणीचे व्हिडीओ बनवू किंवा शेअर करू नयेत, असे बजावले होते.
या आदेशामुळे आता मनसेची पुढील रणनीती आणि पक्षाची भूमिका अधिकृतपणे कोणामार्फत मांडली जाते, याकडे सर्वांचे लक्ष लागले आहे.
