संगमनेर, ०९ जुलै २०२५-प्रतिनिधी:
संगमनेर पोलिसांनी कत्तलीच्या उद्देशाने बांधून ठेवलेली ३५ लहान वासरे ताब्यात घेऊन एका व्यक्तीविरोधात गुन्हा दाखल केला आहे. ही कारवाई मंगळवारी सायंकाळी कुरण येथील कब्रस्तानजवळील एका पत्र्याच्या शेडमध्ये करण्यात आली.
मिळालेल्या माहितीनुसार, संगमनेरचे पोलीस उपअधीक्षक डॉ. कुणाल सोनवणे यांना या संदर्भात गोपनीय माहिती मिळाली होती. कुरण येथील शौकतअली मोहम्मद शेख (वय ३०, रा. कुरण) याने आपल्या पत्र्याच्या शेडमध्ये गोवंश जातीची जनावरे कत्तल करण्याच्या उद्देशाने बांधून ठेवली आहेत. या माहितीच्या आधारे डॉ. सोनवणे यांनी तात्काळ तपास पथकाला कारवाईचे आदेश दिले.
पोलीस उपअधीक्षक सोनवणे यांच्या पथकातील पोलीस हवालदार राहुल सारबंदे आणि राहुल डोके यांनी शहर पोलीस ठाण्यातील पोलीस कॉन्स्टेबल अजित कुऱ्हे आणि रोहिदास शिरसाठ यांना सोबत घेतले. तसेच खाजगी वाहनाने कुरण येथील संबंधित ठिकाणी रवाना झाले.
पथकाने सायंकाळी ५ वाजण्याच्या सुमारास घटनास्थळी पंचांसमक्ष पाहणी केली असता, त्या ठिकाणी लहान वासरे बांधलेली आढळून आली. स्थानिक चौकशीअंती ही जनावरे शौकतअली मोहम्मद शेख याच्या मालकीची असून, त्याने ती कत्तल करण्यासाठी बांधल्याचे समोर आले.
ताब्यात घेण्यात आलेल्या ३५ वासरांची किंमत अंदाजे रु. ३५,०००/- असून, ती काळ्या, पांढऱ्या आणि तांबड्या रंगाची आहेत. बांधलेल्या वासरांची सुटका करत ही वासरे पथकाने ताब्यात घेत पुढील देखभालीसाठी या सर्व वासरांना सायखिंडी येथील जीवदया गोशाळेत पाठवण्यात आले आहे.
याप्रकरणी पोलीस कॉन्स्टेबल राहुल सारबंदे यांनी दिलेल्या तक्रारीवरून संगमनेर शहर पोलीस ठाण्यात शौकतअली मोहम्मद शेख याच्याविरोधात महाराष्ट्र पशुसंरक्षण अधिनियम १९९५ सुधारित २०१५ च्या कलम ५ (अ), १, ९ सह प्राण्यांना निर्दयतेने वागवण्याचे कलम ३, ११ नुसार गुन्हा दाखल करण्यात आला आहे. संगमनेर शहर पोलीस पुढील तपास करत आहेत.
