संगमनेरमध्ये शहीद मेजर संदीप घोडेकर यांच्या स्मारकाची काँग्रेसची मागणी

महाराष्ट्र संवाद ऑनलाईन वृत्त

संगमनेर, प्रतिनिधी: 

संगमनेरचे सुपुत्र, सीआरपीएफ जवान, मेजर संदीप घोडेकर यांच्या स्मरणार्थ संगमनेरमध्ये त्यांचे स्मारक उभारण्यात यावे, अशी मागणी संगमनेर शहर काँग्रेस कमिटीने केली आहे. देशसेवा बजावताना हृदयविकाराच्या झटक्याने त्यांचे दिल्लीत निधन झाले होते. मेजर घोडेकर यांनी देशासाठी दिलेल्या बलिदानाचा विचार करून हे स्मारक उभारणे आवश्यक असल्याचे काँग्रेसने म्हटले आहे.

या मागणीसाठी संगमनेर शहर काँग्रेस कमिटीच्यावतीने नगरपालिका मुख्याधिकाऱ्यांना निवेदन सादर करण्यात आले. यावेळी शहराध्यक्ष सोमेश्वर दिवटे, विश्वास मुर्तडक, राजेंद्र वाकचौरे, गणेश मादास, नितीन अभंग, जावेदखान पठाण, मुजिक खान, वसीम शेख, आवेद खान, डॉ. विजय पवार, शेहेबाजअली शेख, अलोक बर्डे, बादल जेधे, ललित शिंदे, शरद पावबाके, एकनाथ श्रीपत, सुभाष दिघे, संजय कानवडे यांच्यासह मोठ्या संख्येने पदाधिकारी उपस्थित होते.

निवेदनात म्हटले आहे की, मेजर संदीप घोडेकर दिल्ली येथे भारतीय सैन्य दलात कर्तव्य बजावत असताना त्यांना वीरमरण आले. त्यांची देशाप्रती असलेली निष्ठा आणि कर्तव्यपरायणता संगमनेर शहरातील नागरिकांना भविष्यात कायम देशसेवेसाठी प्रेरणा व स्फूर्ती देणारी ठरेल. त्यामुळे त्यांचे संगमनेर येथे स्मारक होणे गरजेचे आहे. याशिवाय, संगमनेर येथील अकोला नाका चौकाला शहीद मेजर संदीप घोडेकर यांचे नाव देण्याची मागणीही या निवेदनात करण्यात आली आहे. या मागणीमुळे संगमनेरमध्ये शहीद मेजर संदीप घोडेकर यांच्या स्मृती जपण्यासाठी एक महत्त्वाचे पाऊल उचलले जात आहे

घोडेकर यांचे बलिदान कायम स्मरणात राहील – बाळासाहेब थोरात

काँग्रेसचे वरिष्ठ नेते, माजी मंत्री बाळासाहेब थोरात यांनी मेजर संदीप घोडेकर यांच्या निधनावर तीव्र दुःख व्यक्त केले आहे. ते म्हणाले की, “संगमनेरचे सुपुत्र मेजर संदीप घोडेकर यांना देशसेवा बजावत असताना मृत्यू आला. जवान हा घरदार सोडून देशाच्या सेवेकरता रात्रंदिवस सज्ज असतो. देश सेवा करताना वीरमरण आलेले हुतात्मा मेजर संदीप घोडेकर यांच्या निधनाची बातमी अत्यंत दुःखदायक आणि मनाला वेदना देणारी आहे. त्यांनी देशाकरता दिलेले बलिदान हे संगमनेरकरांच्या कायम स्मरणात राहील.”

विशेष स्मारक उभारण्यासाठी प्रयत्नशील – डॉ. सुधीर तांबे

माजी आमदार डॉ. सुधीर तांबे यांनीही मेजर संदीप घोडेकर यांच्या योगदानाला आदरांजली वाहिली. ते म्हणाले, “संगमनेर शहरातील घोडेकर परिवारातील मेजर संदीप घोडेकर यांनी कायम देशसेवेला प्राधान्य दिले. देश सेवेसाठी जीवन समर्पित करणाऱ्या या वीर जवानाने अखेरचा श्वासही सेवेत घेतला. इतक्या लवकर जाणे दुर्दैवी आहे. त्यांच्या परिवाराच्या दुःखात संगमनेर तालुका परिवार सहभागी असून त्यांचे बलिदान हे देशासाठी असून सदैव संगमनेरकरांना संस्मरणीय राहील. मेजर संदीप घोडेकर यांचे संगमनेरमध्ये विशेष स्मारक उभारण्यासाठी आम्ही प्रयत्नशील आहोत.”