संगमनेर, प्रतिनिधी:
संगमनेर येथील गटार दुर्घटनेत दुर्दैवी निधन झालेल्या अतुल रतन पवार याच्या कुटुंबीयांना आमदार अमोल खताळ यांच्या प्रयत्नांमुळे शासनाकडून तातडीने १० लाख रुपयांची मदत मिळाली आहे. संगमनेर नगरपालिकेचे मुख्याधिकारी रामदास कोकरे यांनी हा धनादेश पवार कुटुंबीयांच्या निवासस्थानी जाऊन सुपूर्द केला.
आमदार खताळ यांच्या कार्यालयाकडून ही माहिती देण्यात आली आहे. १० जुलै २०२५ रोजी संगमनेर शहरातील कोल्हेवाडी रोडवरील नॅशनल इंग्लिश मीडियम स्कूलजवळ भूमिगत गटाराचे काम सुरू असताना गटार साफ करताना अतुल पवार यांचा दुर्दैवी मृत्यू झाला होता. या घटनेनंतर आमदार अमोल खताळ यांनी पवार कुटुंबीयांची भेट घेऊन त्यांचे सांत्वन केले होते आणि शासनाच्या वतीने ३० लाख रुपयांची मदत देण्याचे लेखी आश्वासन दिले होते.
आमदार खताळ यांच्या सूचनेनुसार, संगमनेर नगर परिषदेचे मुख्याधिकारी तथा प्रशासक रामदास कोकरे यांनी तात्काळ कार्यवाही करत आवश्यक कागदपत्रांची पूर्तता केली आणि १० लाख रुपयांचा पहिला टप्पा मदतीचा धनादेश मृत अतुल पवार यांच्या आई-वडिलांकडे सुपूर्द केला. ही मदत मिळाल्याने पवार कुटुंबीयांनी आमदार अमोल खताळ आणि नगरपरिषद प्रशासनाचे आभार मानले आहेत. उर्वरित रकमेची कार्यवाही देखील लवकरच पूर्ण केली जाईल, असे मुख्याधिकारी कोकरे यांनी सांगितले.
दरम्यान या संदर्भात मुख्याधिकारी कोकरे यांच्याशी संपर्क केला असता त्यांनी सदरची मदत पालिका फंडातून दिल्याची माहिती महाराष्ट्र संवाद न्यूजला दिली.
रियाज पिंजारीलाही मुख्यमंत्री सहायता निधीतून मदत मिळावी: आमदार खताळ यांची मागणी
दरम्यान, संगमनेर गटार दुर्घटनेत अतुल पवार यांना वाचवण्यासाठी गेलेले आणि दुर्दैवी निधन झालेले रियाज पिंजारी याच्या कुटुंबीयांनाही शासनाकडून मुख्यमंत्री सहायता निधीतून मदत मिळावी, अशी मागणी आमदार अमोल खताळ यांनी आज शुक्रवारी विधानसभेत केली आहे. त्यांनी या मागणीकडे सरकारचे लक्ष वेधले.
