महाराष्ट्र संवाद न्यूज ऑनलाईन वृत्त:
पुणे शहरात दारूच्या व्यसनावरून होणाऱ्या कौटुंबिक वादातून एका धक्कादायक घटनेत वडिलांनीच आपल्या मुलाचा गळा दाबून खून केल्याची घटना समोर आली आहे. फुरसुंगी परिसरात घडलेल्या या घटनेने शहरात एकच खळबळ उडाली आहे. पोलिसांनी आरोपी वडिलांना तात्काळ अटक केली असून पुढील तपास सुरू आहे.
मिळालेल्या माहितीनुसार, प्रशांत सुरेश जमदाडे (वय ३५) असे खून झालेल्या तरुणाचे नाव आहे. तर सुरेश बाबुराव जमदाडे (वय ५९, रा. कैलासनगर, वलवा वस्ती, वडकी, हवेली) असे अटक केलेल्या आरोपी वडिलांचे नाव आहे.
मयत प्रशांत याला दारूचे तीव्र व्यसन होते. या व्यसनामुळे तो घरात नेहमीच वाद घालत असे, ज्यामुळे कुटुंबातील शांतता भंग पावत होती. घटनेच्या दिवशीही प्रशांत दारू पिऊन घरी आला आणि त्याने आपल्या आई-वडिलांना शिवीगाळ करण्यास सुरुवात केली. यावरून प्रशांत आणि वडील सुरेश यांच्यात जोरदार भांडण झाले.
संतापलेल्या सुरेश यांनी प्रशांतला जमिनीवर पाडले आणि कापडी रूमालाने त्याचा गळा आवळला. त्यानंतर त्यांनी प्रशांतचे डोके जमिनीवर आपटले, यामुळे त्याचा जागीच मृत्यू झाला. या प्रकरणी आरोपी वडील सुरेश जमदाडे यांना पोलिसांनी अटक केली असून, या घटनेमागील नेमके कारण आणि इतर तपशील तपासले जात आहेत. दारूच्या व्यसनाने एका कुटुंबात घडलेल्या या हृदयद्रावक घटनेमुळे परिसरात हळहळ व्यक्त होत आहे.
