महाराष्ट्र संवाद न्यूज ऑनलाईन वृत्त
रत्नागिरी:
संगमेश्वर तालुक्यातील देवरूख येथील कोसुंब रेवाळेवाडी येथे सासऱ्याने घरातील कामे सांगितल्याच्या रागातून सुनेने जेवणात विषारी द्रव्य मिसळून त्यांना जीवे मारण्याचा धक्कादायक प्रकार समोर आला आहे. या घटनेत पतीलाही विषबाधा झाल्याने परिसरात मोठी खळबळ उडाली आहे. देवरूख पोलिसांनी संबंधित सुनेला अटक केली आहे.
मिळालेल्या माहितीनुसार, सचिन जगन्नाथ सोलकर (वय ३४) यांनी याप्रकरणी फिर्याद दिली आहे. अटक करण्यात आलेल्या सुनेचे नाव स्वप्नाली सचिन सोलकर (वय ३२) असे आहे. सचिन आणि स्वप्नाली यांचा विवाह याच वर्षी १३ एप्रिल २०२५ रोजी झाला होता. स्वप्नालीला सासरे जगन्नाथ सोलकर हे घरातील कचरा काढणे, साफसफाई करणे आणि इतर कामे व्यवस्थित करण्यास सांगत असत. याच गोष्टीचा स्वप्नालीला राग आला.
या रागाच्या भरात तिने जगन्नाथ सोलकर यांना जीवे ठार मारण्याच्या उद्देशाने त्यांच्या जेवणात विषारी द्रव्य मिसळले, असे फिर्यादीत नमूद करण्यात आले आहे. हेच जेवण पती सचिन सोलकर यांनीही खाल्ल्याने त्यांनाही विषबाधा झाली. ही घटना २२ जुलै रोजी रात्री ९.३० वाजता घडली.
विषबाधेमुळे जगन्नाथ सोलकर आणि सचिन सोलकर यांना अचानक अस्वस्थ वाटू लागले. त्यांना तात्काळ देवरूख ग्रामीण रुग्णालयात उपचारासाठी दाखल करण्यात आले. त्यानंतर अधिक उपचारासाठी त्यांना जिल्हा शासकीय रुग्णालयात हलवण्यात आले. उपचारादरम्यान, दोघांनाही विषबाधा झाल्याचे स्पष्ट झाले. सुदैवाने, आता दोघांचीही प्रकृती स्थिर असल्याची माहिती देण्यात आली आहे.
सचिन सोलकर यांनी दिलेल्या फिर्यादीनुसार, स्वप्नाली सोलकर हिच्यावर देवरूख पोलीस ठाण्यात शुक्रवारी उशिरा गुन्हा दाखल करण्यात आला असून, पोलिसांनी तिला ताब्यात घेतले आहे. या प्रकरणाचा अधिक तपास देवरूख पोलीस करत आहेत.
