महाराष्ट्र संवाद न्यूज ऑनलाईन वृत्त
मुंबई, विशेष प्रतिनिधी:
कायदा व सुव्यवस्था राखण्यासाठी स्थापन केलेल्या ट्रॉम्बे पोलिसांच्या मोहल्ला कमिटीच्या व्हॉट्सॲप ग्रुपमध्ये एका हॅकरने प्रवेश करत एपीके (APK) फाईल शेअर केली. या फाईलवर क्लिक करताच एका पोलीस कर्मचाऱ्याला तब्बल साडेसात लाख रुपयांना फसवणुकीचा फटका बसला आहे. सायबर भामट्याने त्यांच्या नावाने कर्ज काढून ती रक्कम दुसऱ्या खात्यात वळवली आहे. या प्रकरणी ट्रॉम्बे पोलीस आणि सायबर पोलीस अधिक तपास करत आहेत.
पोलिसांनी दिलेल्या माहितीनुसार, नवी मुंबईत राहणारे एक पोलीस शिपाई सप्टेंबर २०२४ पासून ट्रॉम्बे पोलीस ठाण्यात कार्यरत आहेत. ट्रॉम्बे पोलीस ठाण्याच्या हद्दीत शांतता व सुव्यवस्था राखण्यासाठी आणि महत्त्वाच्या सूचना देण्यासाठी पोलीस अधिकारी, अंमलदार आणि परिसरातील प्रतिष्ठित व्यक्तींचा ‘मोहल्ला कमिटी ट्रॉम्बे’ नावाचा एक व्हॉट्सॲप ग्रुप तयार करण्यात आला आहे.
या ग्रुपमध्ये २२ जुलै रोजी दुपारी ‘आरटीओ चलन’ नावाची एक एपीके फाईल आली. तक्रारदार असलेल्या पोलीस शिपायाने त्या फाईलमध्ये काय आहे हे पाहण्यासाठी त्यावर क्लिक केले. मात्र, काहीच उघडले नाही. पण, त्याच वेळी सायबर ठगांना त्यांच्या मोबाईलचा ॲक्सेस मिळाला. काही वेळातच त्यांच्या मोबाईल नंबरवर आर्थिक व्यवहारांचे मेसेज येऊ लागले. सायंकाळी सहा वाजता त्यांच्या बँक खात्यात ७.५८ लाख रुपये जमा झाल्याचा संदेश आला. विशेष म्हणजे, अवघ्या १२ मिनिटांत खात्यातून ४ लाख ९९ हजार रुपये, आणि त्यानंतरच्या मिनिटात आणखी २ लाख ५५ हजार रुपये दुसऱ्या खात्यात वर्ग झाले.
आपली सायबर फसवणूक झाल्याची खात्री पटताच पोलीस शिपायाने तात्काळ सायबर क्राईम हेल्पलाइन नंबरवर कॉल करून तक्रार नोंदवण्याचा प्रयत्न केला. मात्र, तांत्रिक अडचणींमुळे त्यांना लगेच तक्रार नोंदवता आली नाही. त्यानंतर त्यांनी पुन्हा तक्रार नोंदवली.
फसवणूक कशी झाली?
सायबर भामट्याने एपीके फाईलद्वारे मोबाईलचा ताबा मिळवला. त्यानंतर त्यांनी बनावट कागदपत्रे आणि इलेक्ट्रॉनिक रेकॉर्ड्स तयार करून बँकेत सादर केली. यामुळे त्यांना पर्सनल लोन मंजूर झाले आणि ती रक्कम त्यांनी अन्य खात्यात वर्ग केली, असे प्राथमिक तपासात स्पष्ट झाले आहे. यानंतर पोलिसांनी गुन्हा दाखल करून तपास सुरू केला आहे.
