महाराष्ट्र संवाद न्यूज ऑनलाईन वृत्त
संगमनेर, प्रतिनिधी:
संगमनेर तालुक्यातील निमोण येथील भूमिपुत्र आणि सध्या येवला येथे पोलीस निरीक्षक म्हणून कार्यरत असलेले संदीप पुंजा मंडलिक यांना त्यांच्या अतुलनीय शौर्यासाठी तिसऱ्यांदा राष्ट्रपती पोलीस शौर्य पदकाने सन्मानित करण्यात आले आहे. राज्याचे राज्यपाल सी.पी. राधाकृष्णन् यांच्या हस्ते त्यांना हे प्रतिष्ठित पदक प्रदान करण्यात आले.
पोलीस निरीक्षक मंडलिक यांनी गडचिरोली येथे नक्षलवाद्यांविरुद्ध केलेल्या धाडसी कामगिरीबद्दल त्यांना हा सन्मान मिळाला आहे. २०१३ ते २०२४ या काळात ते गडचिरोली येथे कार्यरत असताना, त्यांनी खोब्रामेंढा गावाजवळच्या घनदाट जंगलात झालेल्या एका मोठ्या चकमकीत पाच नक्षलवाद्यांचा खात्मा करण्यात मोलाची भूमिका बजावली होती. या कारवाईदरम्यान मोठ्या प्रमाणात शस्त्रसाठाही जप्त करण्यात आला होता.
नक्षलवाद संपुष्टात आणण्याच्या या महत्त्वपूर्ण कामगिरीतील त्यांच्या योगदानाला गौरवण्यासाठी २९ जुलै रोजी त्यांना पोलीस शौर्य पदक देण्यात आले. विशेष म्हणजे, यापूर्वीही त्यांना दोन वेळा राष्ट्रपती पोलीस शौर्य पदकाने सन्मानित करण्यात आले आहे.
या बहुमानाबद्दल संगमनेरचे आमदार अमोल खताळ, निमोण गावचे सरपंच संदीप देशमुख, आणि परिसरातील ग्रामस्थांनी, मित्रमंडळी व नातेवाईकांनी त्यांचे अभिनंदन केले आहे.
