महाराष्ट्र संवाद न्यूज ऑनलाईन संगमनेर: रोटरी इंटरनॅशनल डिस्ट्रिक्ट ३१३२ च्या रोटरी वर्ष २०२६–२७ साठी रो. आनंद किसन हासे यांची असिस्टंट गव्हर्नर म्हणून निवड करण्यात आली आहे. त्यांच्यावर रोटरी क्लब ऑफ शिर्डी साईबाबा, रोटरी क्लब ऑफ कोपरगाव सेंट्रल आणि रोटरी क्लब ऑफ अकोले सेंट्रल या तीन क्लबच्या मार्गदर्शन व समन्वयाची महत्त्वपूर्ण जबाबदारी सोपविण्यात आली आहे.
रोटरी जिल्हा ३१३२ चे प्रांतपाल रो. जयेशभाई पटेल यांच्या नेतृत्वाखाली आनंद हासे हे या तीनही क्लबचे नेतृत्व विकास, वार्षिक नियोजन, सदस्यवाढ, द रोटरी फाउंडेशन, प्रभावी सेवा प्रकल्प तसेच जिल्ह्याच्या उद्दिष्टांशी सुसंगत कार्य करण्यासाठी मार्गदर्शन करणार आहेत.
हासे हे रोटरी क्लब ऑफ संगमनेरचे माजी अध्यक्ष असून त्यांच्या अध्यक्षीय कार्यकाळात त्यांनी ‘फुलझडी’, कोविड काळात पती गमाविलेल्या एकल महिलांना पीठ गिरणी वितरण, शिलाई मशीन वितरण यांसारखे नाविन्यपूर्ण, स्वयंपूर्ण आणि समाजाभिमुख प्रकल्प यशस्वीरीत्या राबविले. त्यांच्या नेतृत्वाखाली क्लबने आरोग्य, शिक्षण, महिला सक्षमीकरण आणि सामाजिक विकासाच्या क्षेत्रात अनेक उल्लेखनीय उपक्रम राबवून समाजात वेगळी ओळख निर्माण केली आहे.
व्यावसायिकदृष्ट्या हासे हे युवा पॉलीप्रिंट अँड पॅकेजिंग इंडस्ट्रीज तसेच दैनिक युवावार्ताचे संचालक आहेत. याशिवाय ते रोटरी आय केअर ट्रस्टचे विश्वस्त, महाराष्ट्र चेंबर्स ऑफ कॉमर्सचे संचालक तसेच श्रीसंगम ग्रामीण बिगर शेती सहकारी पतसंस्थेचे संचालक म्हणूनही कार्यरत आहेत. उद्योग, सामाजिक बांधिलकी आणि सेवाभावी नेतृत्व यांचा समतोल साधत त्यांनी विविध क्षेत्रांत उल्लेखनीय कार्य केले आहे. आपल्या निवडीबद्दल हासे म्हणाले, “असिस्टंट गव्हर्नर म्हणून मिळालेली ही जबाबदारी माझ्यासाठी मोठा सन्मान असून त्याचबरोबर ती एक महत्त्वाची जबाबदारीही आहे. प्रांतपाल रो. जयेशभाई पटेल यांच्या संकल्पनेनुसार तिन्ही क्लबसोबत समन्वय साधून अधिक प्रभावी, शाश्वत आणि समाजोपयोगी प्रकल्प राबविण्यास प्राधान्य देणार आहे.”
महाराष्ट्र संवाद न्यूज ऑनलाईन 
