महाराष्ट्र संवाद न्यूज ऑनलाईन
संगमनेर, प्रतिनिधी:
संगमनेर तालुक्यातील एका सेवाभावी संस्थेची बदनामी करण्याची धमकी देऊन १० लाख रुपयांची खंडणी मागितल्याप्रकरणी ‘न्यूज सह्याद्री एक्सप्रेस’ नावाच्या युट्यूब चॅनेलच्या चालकाविरोधात संगमनेर तालुका पोलीस ठाण्यात गुन्हा दाखल करण्यात आला असून साळवे नावाच्या व्यक्तीला ताब्यात घेण्यात आले आहे.
संगमनेर तालुक्यातील वडगाव पान येथील ‘दत्त धाम सरकार, दत्त दिगंबर सेवाभावी संस्थे’चे कामकाज पाहणारे शिवम राजेंद्र गडगे (वय २१) यांनी यासंदर्भात तक्रार दाखल केली आहे. आरोपीचे नाव साळवे (पूर्ण नाव माहित नाही रा. अकोले) असे असून, तो ‘न्यूज सह्याद्री एक्सप्रेस’ नावाचा युट्यूब चॅनेल चालवतो.
गडगे यांनी संगमनेर तालुका पोलीस ठाण्यात दाखल केलेल्या तक्रारीनुसार, जुलै २०२४ पासून साळवे हा शिवम गडगे यांना संस्थेची बदनामी करणारे व्हिडिओ युट्यूबवर प्रसारित करण्याची धमकी देत होता. हे व्हिडिओ टाकू नयेत म्हणून तो त्यांच्याकडे पैशाची मागणी करत होता. ४ ऑगस्ट २०२५ रोजी त्याने व्हॉट्सॲपवर गडगे यांच्याकडे १० लाख रुपयांची मागणी केली. वाटाघाटीनंतर ही रक्कम ६ लाख रुपयांवर ठरली, यापैकी ३ लाख तात्काळ आणि उर्वरित ३ लाख नंतर देण्याचे ठरले.
मंगळवारी (५ ऑगस्ट) सकाळी साळवेने पुन्हा फोन करून ४ लाख रुपये देण्याची मागणी केली. त्यासाठी त्याने गडगे यांना आधी धांदरफळ फाटा येथे आणि नंतर अकोले येथील बस स्टँडजवळील त्याच्या कार्यालयात बोलावले होते.
अखेर, या सततच्या खंडणीच्या मागणीला कंटाळून गडगे यांनी दिलेल्या फिर्यादीवरून बुधवारी संध्याकाळी संगमनेर तालुका पोलीस ठाण्यात गुन्हा रजिस्टर नंबर ५४४ भारतीय न्याय संहिता (BNS), २०२३, कलम ३०८(२) आणि ३०८(३) अंतर्गत गुन्हा दाखल करण्यात आला आहे. पुढील तपास सहायक पोलीस उपनिरीक्षक सालोमन सातपुते करत आहेत.
