महाराष्ट्र संवाद न्यूज ऑनलाईन
दिल्ली: काँग्रेस नेते आणि लोकसभेतील विरोधी पक्षनेते राहुल गांधी यांनी पुन्हा एकदा निवडणूक आयोगावर गंभीर आरोप केले आहेत. पत्रकार परिषद घेऊन त्यांनी महाराष्ट्रातील विधानसभा निवडणुकीत झालेल्या कथित मतचोरीचा पर्दाफाश केल्याचा दावा केला आहे. महाराष्ट्रातील ४० लाखांहून अधिक मतदारांच्या याद्यांमध्ये संशयास्पद बाबी असल्याचं सांगत, त्यांनी निवडणूक आयोगाच्या भूमिकेवर आणि निवडणुकांवर प्रश्नचिन्ह उपस्थित केलं.
महाराष्ट्रातील ४० लाख मतदारांचा घोटाळा?
राहुल गांधींच्या म्हणण्यानुसार, महाराष्ट्रातील लोकसभा निवडणुकीनंतर अवघ्या पाच महिन्यांत तब्बल ४० लाख मतदार वाढले, जे गेल्या पाच वर्षांतही वाढले नव्हते. निवडणुकीच्या काळात, विशेषतः संध्याकाळनंतर मतदानाच्या टक्क्यांमध्ये झालेली अचानक वाढही संशयास्पद असल्याचं त्यांनी सांगितलं. त्यांच्या मते, काँग्रेसला लोकसभा निवडणुकीत चांगलं यश मिळालं असतानाही, विधानसभा निवडणुकीत मात्र धक्कादायक निकाल लागले, यामागे हेच कारण असू शकतं.
मतदारांची बनावट यादी आणि ‘फॉर्म ६’ चा गैरवापर
राहुल गांधींनी सादर केलेल्या पुराव्यांनुसार, वाढलेल्या मतदारांमध्ये मोठ्या प्रमाणात बनावट नावं, पत्ते आणि फोटो आहेत. त्यांनी ‘फॉर्म ६’ चा दुरुपयोग झाल्याचा आरोप केला.
कर्नाटक मधील एका मतदार संघाच्या एका उदाहरणाद्वारे त्यांनी स्पष्ट केलं की, शकुन राणी नावाच्या ७० वर्षीय महिलेने दोनदा अर्ज क्रमांक ६ भरला होता. दुसऱ्या अर्जात नाव ‘शकुनराणी’ असं होतं. हा अर्ज कोणी भरला किंवा त्या महिलेच्या नावाने कोणीतरी मतदान केलं असावं, असा संशय त्यांनी व्यक्त केला. ३३,६९२ नावांची यादी त्यांनी दाखवली, ज्यात बहुतांश मतदारांचं वय ९५, ९६, ९८ असं होतं. ही सर्व नावं बनावट असल्याचा त्यांचा दावा आहे. बंगळूर लोकसभा निवडणुकीतही अशाच प्रकारे मतदारांची चोरी झाल्याचं त्यांनी सांगितलं.
राहुल गांधींनी मतदारांच्या याद्यांमध्ये गैरव्यवहार झाल्याचे पाच प्रकार सांगितले:
* दुबार मतदार: एकाच व्यक्तीचं नाव मतदार यादीत अनेक वेळा असणं.
* बनावट पत्ते आणि तपशील: चुकीच्या पत्त्यांचा वापर करून बनावट ओळख तयार करणे.
* एकाच पत्त्यावर अनेक लोक: एकाच पत्त्यावर ५० ते ६० लोक राहत असल्याचं दाखवणं, जिथे प्रत्यक्षात ४-५ लोकच राहतात.
* अस्पष्ट फोटो: ओळख पटणार नाही असे अस्पष्ट फोटो वापरणे.
* ‘फॉर्म ६’ चा गैरवापर: मतदारांच्या नोंदणीसाठी वापरल्या जाणाऱ्या ‘फॉर्म ६’ चा चुकीच्या पद्धतीने उपयोग करणे.
राहुल गांधींनी पत्रकार परिषदेत हे सर्व पुरावे दाखवून निवडणूक आयोगाच्या भूमिकेवर प्रश्नचिन्ह उपस्थित केलं. या गंभीर आरोपांमुळे राजकीय वर्तुळात मोठी चर्चा सुरू झाली आहे.
