महाराष्ट्र संवाद न्यूज ऑनलाईन
संगमनेर, प्रतिनिधी: देशातील सहकार क्षेत्रासाठी एक आदर्श ठरलेल्या संगमनेरच्या सहकारमहर्षी भाऊसाहेब थोरात सहकारी साखर कारखान्याच्या नवीन प्रशासकीय इमारतीचे उद्घाटन स्वातंत्र्य दिनाच्या पूर्वसंध्येला, म्हणजेच गुरुवारी (१४ ऑगस्ट) होणार आहे. या कार्यक्रमाला माजी महसूल व कृषी मंत्री बाळासाहेब थोरात, माजी आमदार डॉ. सुधीर तांबे, आणि आमदार सत्यजित तांबे यांची प्रमुख उपस्थिती राहणार आहे.
कारखान्याचे व्हाईस चेअरमन पांडुरंग पाटील घुले यांनी दिलेल्या माहितीनुसार, काँग्रेसचे ज्येष्ठ नेते, माजी मंत्री बाळासाहेब थोरात यांच्या नेतृत्वाखाली कारखान्याने कायमच शेतकरी, कामगार आणि ऊस उत्पादकांचे हित जपले आहे. तसेच, कारखान्याने ५५०० मेट्रिक टन गाळप क्षमता आणि ३० मेगावॅट वीज निर्मितीचा प्रकल्प यशस्वीपणे राबवून राज्यासाठी एक नवा आदर्श निर्माण केला आहे.
प्रशासकीय कामकाजात अधिक सुसूत्रता आणण्यासाठी कारखान्याच्या मुख्य प्रवेशद्वाराजवळ सर्व सोयींनी युक्त अशी अद्ययावत इमारत उभारण्यात आली आहे. या इमारतीचे उद्घाटन संध्याकाळी ५ वाजता कारखान्याचे विद्यमान चेअरमन बाळासाहेब थोरात यांच्यासह कारखान्याचे माजी चेअरमन केरुजी हरुजी गुंजाळ, बाजीराव पाटील खेमनर, लक्ष्मणराव कुटे, माधवराव कानवडे आणि बाबासाहेब ओहोळ या आजी-माजी अध्यक्षांच्या हस्ते होणार आहे.
तर कार्यक्रमाचे अध्यक्षस्थान आमदार डॉ. सुधीर तांबे भूषवणार आहेत. या सोहळ्यासाठी आमदार सत्यजित तांबे आणि डॉ. जयश्री थोरात यांचीही विशेष उपस्थिती असणार आहे. संगमनेर तालुक्यातील विविध संस्थांचे पदाधिकारी आणि मान्यवर देखील या कार्यक्रमाला उपस्थित राहणार आहेत.
कार्यकारी संचालक जगन्नाथ घुगरकर आणि सर्व संचालक मंडळाने सभासद, शेतकरी, ऊस उत्पादक, कार्यकर्ते आणि पदाधिकाऱ्यांना मोठ्या संख्येने उपस्थित राहण्याचे आवाहन केले आहे.
