महाराष्ट्र संवाद न्यूज ऑनलाईन
अकोले: अकोले शहरात सुरू असलेल्या ऑनलाईन बिंगो, मटका आणि डॉलर जुगाराच्या अड्ड्यावर अहिल्यानगरच्या स्थानिक गुन्हे शाखेने (LCB) छापा टाकला. या कारवाईत पोलिसांनी १६ जणांविरुद्ध गुन्हा दाखल केला असून, त्यांच्याकडून ४ लाख ९८ हजार ७०० रुपयांचा मुद्देमाल जप्त करण्यात आला आहे.
मिळालेल्या माहितीनुसार, अकोले शहरातील बसस्थानकासमोरील नवले कॉम्प्लेक्समध्ये ऑनलाईन जुगार सुरू असल्याची गुप्त माहिती स्थानिक गुन्हे शाखेचे पोलीस निरीक्षक किरणकुमार कबाडी यांना मिळाली होती. या माहितीच्या आधारे, पोलिसांनी सापळा रचून कारवाई केली. या छाप्यात बिंगो, मटका आणि डॉलर या जुगारांचे साहित्य आणि साधने जप्त करण्यात आली.
या प्रकरणी नितीन निवृत्ती गायकवाड, अमोल मारुती मोहिते, वैभव राजेंद्र गायकवाड, व्हेल्सी गफुर वाघीलो, अक्षय बाबासाहेब सकट, गोपी भाऊराव आवारी, अरबाज मोहम्मद शेख, आकाश संजय परदेशी, रमेश एकनाथ फापाळे, अनिल बाळू पवार, विकास दत्तात्रय आबरे, खंडू केरु सदणीर, शंशीकांत मुरलीधर बेनके, अशोक राजेंद्र जगताप, गणेश हौसराव साबळे आणि अतुल जालिंदर नवले या १६ जणांविरुद्ध अकोले पोलीस ठाण्यात गुन्हा दाखल करण्यात आला आहे.
ही यशस्वी कारवाई स्थानिक गुन्हे शाखेचे पोलीस उपनिरीक्षक अनंत सालगुडे, पोलीस अंमलदार गणेश लोंढे, भाऊसाहेब काळे, सागर ससाणे, आकाश काळे आणि अरुण मोरे यांच्या पथकाने केली. या कारवाईमुळे अवैध धंदे सुरूच असल्याचे समोर आले आहे.
ऑनलाईन जुगारावर पोलिसांचा छापा; १६ जणांवर गुन्हा दाखल
ऑनलाईन जुगार सुरू असल्याची गुप्त माहिती स्थानिक गुन्हे शाखेचे पोलीस निरीक्षक किरणकुमार कबाडी यांना मिळाली होती.
