संगमनेरमध्ये उपमुख्यमंत्री एकनाथ शिंदे यांच्या रॅलीत गोंधळ, परिस्थिती नियंत्रणात आणण्यासाठी पोलिसांचा लाठीचार्ज

महाराष्ट्र संवाद न्यूज ऑनलाईन

संगमनेर, प्रतिनिधी: राज्याचे उपमुख्यमंत्री एकनाथ शिंदे यांच्या रविवारी झालेल्या संगमनेर दौऱ्यादरम्यान त्यांच्या रॅलीत मोठा गोंधळ झाल्याची घटना समोर आली आहे. रॅलीच्या वेळी सभेच्या ठिकाणाजवळ काही शिवसैनिकांनी गोंधळ घातला. परिस्थिती हाताबाहेर जात असल्याचे पाहून अखेर पोलिसांना सौम्य लाठीचार्ज करावा लागला.

आज उपमुख्यमंत्री एकनाथ शिंदे यांच्या हस्ते आमदार अमोल खताळ यांच्या संपर्क कार्यालयाचे उद्घाटन करण्यात आले होते. यादरम्यान उपमुख्यमंत्री शिंदे यांची संगमनेरमध्ये भव्य रॅली काढण्यात आली होती, त्यानंतर त्यांची जाणता राजा मैदानावर सभा आयोजित करण्यात आली होती. मात्र, रॅली सभास्थळी पोहोचताच मंचाजवळ अचानक काही कार्यकर्त्यांमध्ये वाद सुरू झाला आणि गोंधळ वाढू लागला. 

परिस्थिती नियंत्रणात आणण्याचा प्रयत्न करूनही गोंधळ वाढतच गेल्याने अखेर पोलिसांनी हस्तक्षेप करत बळाचा वापर केला. या घटनेमुळे काही काळ परिसरात तणावाचे वातावरण निर्माण झाले होते.

या गोंधळामुळे पोलिसांच्या नियोजनावर प्रश्नचिन्ह निर्माण झाले आहे. अचानक झालेल्या या राड्यामुळे रॅलीच्या आयोजनातील त्रुटीही उघड झाल्या आहेत. गोंधळ घालणारे कार्यकर्ते नेमके कोण होते, याची माहिती अद्याप समोर आलेली नाही. या घटनेचा व्हिडिओही समाज माध्यमांवर व्हायरल झाला आहे.