राज्यात चांगला पाऊस पडू दे, ओबीसी आरक्षणाला धक्का न लागता मराठा आरक्षण यशस्वी होऊ दे: बाळासाहेब थोरात यांची गणेश चरणी प्रार्थना

महाराष्ट्र संवाद न्यूज ऑनलाईन

संगमनेर, प्रतिनिधी: काँग्रेस नेते बाळासाहेब थोरात यांनी गणेशोत्सवानिमित्त राज्यातील शेतकरी आणि सर्वसामान्य नागरिक सुखी, समाधानी व्हावेत, अशी प्रार्थना केली आहे. तसेच, मराठा आरक्षणाचे आंदोलन यशस्वी होऊन ओबीसी आरक्षणाला धक्का न लागता मराठा समाजाला आरक्षण मिळावे, अशी अपेक्षाही त्यांनी व्यक्त केली आहे.

थोरात यांनी आपल्या ‘सुदर्शन निवासस्थानी’ सपत्नीक गणेशाची स्थापना केली, त्यावेळी ते बोलत होते. त्यांच्यासोबत कन्या डॉ. जयश्री थोरात आणि टाटा कॅन्सर हॉस्पिटलचे विभाग प्रमुख प्रा. डॉ. हसमुख जैन उपस्थित होते.

यावर्षी काही भागांमध्ये चांगला पाऊस झाला असला तरी काही ठिकाणी पाऊस कमी आहे. त्यामुळे राज्यात सर्वत्र चांगला पाऊस पडून शेतकरी सुखी आणि समाधानी व्हावा, अशी प्रार्थना थोरात यांनी केली.

मराठा आरक्षणाला पाठिंबा- मनोज जरांगे यांच्या नेतृत्वाखाली सुरू असलेल्या मराठा समाजाच्या आंदोलनाचे थोरात यांनी समर्थन केले. हे आंदोलन एक लोकचळवळ असून सरकारने मराठा समाजाच्या मागण्यांचा आदर करून त्यांना तातडीने आरक्षण द्यावे असे ते म्हणाले. ओबीसी, आदिवासी आणि इतर मागासवर्गीयांच्या आरक्षणाला कोणताही धक्का न लावता मराठा समाजाला आरक्षण मिळावे, ही आमची मुख्य मागणी आहे, असेही त्यांनी स्पष्ट केले.

या आंदोलनाला सर्वांनी पाठिंबा दिला पाहिजे असे आवाहन थोरात यांनी केले. महाविकास आघाडीच्या काळातही मराठा आरक्षणासाठी सातत्याने पाठपुरावा केला होता, अशी आठवण त्यांनी करून दिली.

यावेळी डॉ. जयश्री थोरात यांनीही गणेशोत्सवाच्या शुभेच्छा दिल्या. संगमनेर शहर आणि तालुक्यातील सर्व नागरिकांच्या जीवनातील विघ्ने गणेशाने दूर करावीत, अशी प्रार्थना त्यांनी केली.

यावेळी सुदर्शन निवासस्थान, अमृत उद्योग समूह, राजहंस दूध संघ, अमृतवाहिनी बँक, यशोधन कार्यालय अशा विविध ठिकाणी गणेशाची स्थापना करण्यात आली.