संगमनेरच्या मेनरोडवर डीजे वाजवण्यास ‘यांनी’ घेतला आक्षेप, हे आहे कारण….

महाराष्ट्र संवाद न्यूज ऑनलाईन

संगमनेर,प्रतिनिधी: संगमनेर शहरातील मेनरोडवर कोणत्याही सण, उत्सव किंवा मिरवणुकीमध्ये कर्कश आवाजातील डीजे वाजवण्यास बंदी घालावी, अशी मागणी करत शहरातील व्यापारी आणि नागरिकांनी प्रांताधिकारी कार्यालयात जात प्रांताधिकारी अरुण उंडे यांना एक सामूहिक निवेदन दिले आहे.

या निवेदनामध्ये, संगमनेर शहरातील मेनरोडवर डीजेच्या मोठ्या आवाजामुळे होणाऱ्या त्रासाचे गांभीर्य मांडण्यात आले आहे. डीजेच्या दणदणाटामुळे दुकानांमधील विक्री व्यवसायावर मोठ्या प्रमाणात परिणाम होत असून व्यापाऱ्यांचे आर्थिक नुकसान होत आहे. तसेच, आवाजाच्या कंपनामुळे अनेक घरांमध्ये वस्तू खाली पडून नुकसान होत असल्याच्या तक्रारीही नागरिकांनी केल्या आहेत.

याशिवाय, ज्येष्ठ नागरिक, लहान मुले आणि रुग्णांना डीजेच्या मोठ्या आवाजामुळे आरोग्याच्या समस्यांना सामोरे जावे लागत असल्याने मेनरोडवर कोणत्याही कार्यक्रमात डीजे वाजवण्यासाठी परवानगी दिली जाऊ नये असे, निवेदनात नमूद करण्यात आले आहे.

या संदर्भात, याआधी गणेशोत्सवाच्या पार्श्वभूमीवर झालेल्या शांतता समितीच्या बैठकीत श्रीरामपूरचे अप्पर पोलीस अधीक्षक सोमनाथ वाघचौरे यांनी कोणत्याही ठिकाणी डीजे वाजल्यास तात्काळ कारवाई करून तो जप्त करण्याचे आदेश दिले होते. मात्र, स्थानिक प्रशासनाने या आदेशांकडे दुर्लक्ष केल्याचा आरोप अर्जदारांनी केला आहे.

या मागणीकडे दुर्लक्ष झाल्यास, न्यायालयाच्या आदेशाचे उल्लंघन करणाऱ्या अधिकाऱ्यांविरुद्ध न्यायालयात धाव घेऊन त्यांच्यावर गुन्हा दाखल करण्याचा इशाराही व्यापारी आणि नागरिकांनी दिला आहे.

या निवेदनाची प्रत मुख्यमंत्री देवेंद्र फडणवीस, उपमुख्यमंत्री एकनाथ शिंदे व अजित पवार, स्थानिक आमदार अमोल खताळ, जिल्हा पोलीस प्रमुख सोमनाथ घार्गे, अप्पर जिल्हा पोलीस अधिकारी सोमनाथ वाघचौरे आणि डीवायएसपी डॉ. कुणाल सोनवणे यांना पाठवण्यात आली आहे.