ढोल-ताशांच्या गजरात दुमदुमले संगमनेर, ‘आय लव संगमनेर’च्या महावादन सोहळ्याला प्रचंड प्रतिसाद

आदर्श संगमनेर तालुक्याचा लौकिक देशात वाढवा – माजीमंत्री बाळासाहेब थोरात

‘आय लव संगमनेर’ ही चळवळ संगमनेरची संपन्नता वाढवणारी – आमदार सत्यजित तांबे

महावादन सोहळ्यातून स्थानिक कलाकारांचा गौरव

संगमनेर – 

शुक्रवारी गणेशोत्सवाच्या उत्साहात संगमनेर शहर ढोल-ताशांच्या गजराने दुमदुमून गेले. ‘आय लव संगमनेर’ या चळवळीच्यावतीने आयोजित करण्यात आलेल्या महावादन सोहळ्यामध्ये तब्बल ४०० हून अधिक कलाकारांनी एकत्र येत अप्रतिम सादरीकरण केले. या कार्यक्रमाला शहरातील नागरिकांचा मोठा प्रतिसाद लाभला.

या सोहळ्याला प्रमुख अतिथी म्हणून काँग्रेसचे ज्येष्ठ नेते, माजी मंत्री बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, डॉ. जयश्री थोरात, गिरीश मालपाणी, दिलीप पुंड, डॉ. मैथिली तांबे, नितीन अभंग यांच्यासह ‘आय लव संगमनेर’ चळवळीचे सर्व पदाधिकारी व कार्यकर्ते मोठ्या संख्येने उपस्थित होते. यांच्यासह अनेक मान्यवर उपस्थित होते.

आदर्श संगमनेर तालुक्याचा लौकिक देशभरात वाढवा – बाळासाहेब थोरात म्हणाले, संगमनेर तालुक्याला शिक्षण, सहकार आणि कृषी क्षेत्राच्या विकासाची मोठी परंपरा आहे. इथला राजकीय सुसंस्कृतपणा आणि सर्वधर्म समभावाचे वातावरण आदर्शवत आहे. हे आदर्श कायम ठेवत, तरुणांनी ‘आय लव संगमनेर’सारख्या चळवळींच्या माध्यमातून तालुक्याचा लौकिक वाढवावा. ‘आय लव संगमनेर’ ही चळवळ शहराची संपन्नता वाढवण्यासाठी एक मोठे व्यासपीठ ठरत असल्याचेही त्यांनी सांगितले.

महावादन सोहळा संगमनेरच्या एकतेचे प्रतीक – या सोहळ्याचे आयोजक आमदार सत्यजित तांबे यांनी सांगितले की, संगमनेरमधील अनेक ढोल-ताशा पथके देशभरात आपली कला सादर करतात. या गुणी कलाकारांना एकाच व्यासपीठावर आणून त्यांचा गौरव करणे हा या कार्यक्रमाचा मुख्य उद्देश आहे. सर्व जातीधर्माचे लोक एकत्र येऊन सण-उत्सव साजरे करतात, ही संगमनेरची खरी ओळख आहे. हा महावादन सोहळा केवळ कलाकारांना प्रोत्साहन देत नाही, तर संगमनेरच्या एकतेचे आणि समृद्ध संस्कृतीचे प्रतीक आहे.

हजारो लोकांची विक्रमी उपस्थिती – संगमनेर बस स्थानकावर आयोजित केलेल्या या सोहळ्यामध्ये तांडव, रुद्र, एकलव्य, छावा, हिंदू राजा अशा अनेक नामांकित ढोल-ताशा पथकांनी सहभाग घेतला. मराठी आणि हिंदी गाण्यांच्या तालावर ढोल-ताशांच्या गजराने संपूर्ण वातावरण भारून गेले होते. आकर्षक विद्युत रोषणाई आणि भक्तिमय वातावरणात झालेल्या या सोहळ्याला हजारो नागरिकांनी उपस्थिती लावली.

यावेळी डॉ. सुधीर तांबे, गिरीश मालपाणी आणि डॉ. जयश्री थोरात यांनीही सर्वांना गणेशोत्सवाच्या शुभेच्छा दिल्या.