‘अँटी करप्शन’चा बहाणा करून ज्येष्ठ नागरिकाची फसवणूक

नाशिक – 

पोलीस असल्याचा बनाव रचून ज्येष्ठ नागरिकांना लुटण्याच्या घटना शहरात वाढत आहेत. अशाच एका घटनेत, पाथर्डी फाटा परिसरात एका वृद्धाला रोखून ‘आम्ही अँटी करप्शनवाले आहोत’ असे सांगत, त्यांच्याकडील दोन सोन्याच्या अंगठ्या आणि रोख रक्कम हातचलाखीने लंपास करण्यात आली आहे.

याप्रकरणी आनंदराव सोनार (वय ६६, रा. आनंदनगर, पाथर्डी फाटा) यांनी इंदिरानगर पोलिस ठाण्यात तक्रार दाखल केली आहे. आनंदराव सोनार दुपारी ३ वाजता त्यांच्या पत्नीसोबत पाथर्डी फाटा येथून पायी जात असताना, एका व्यक्तीने त्यांना थांबवले. काका, तुम्हाला खूप वेळ झाला आवाज देतोय, ऐकू आलं नाही का? असे म्हणून त्याने त्यांना बाजूला बोलावले.

त्यानंतर त्या भामट्याने, आम्ही अँटी करप्शन विभागाचे अधिकारी आहोत. येथे एका महिलेला चाकू लावून तिच्याजवळून चोरी झाली आहे, त्यामुळे आम्हाला तुमची बॅग तपासावी लागेल, असे सांगितले. बॅग तपासणीचा बहाणा करत त्याने बॅगेत ठेवलेल्या दोन सोन्याच्या अंगठ्या आणि काही रोख रक्कम मोठ्या चलाखीने चोरून घेतली.

शहरात अशा तोतया पोलिसांचा वावर वाढल्याने ज्येष्ठ नागरिकांच्या सुरक्षिततेचा प्रश्न पुन्हा एकदा ऐरणीवर आला आहे. पोलिसांकडून अद्यापही अशा एकाही तोतया पोलिसाला पकडण्यात यश आले नसल्याने नागरिकांमध्ये चिंतेचे वातावरण आहे. पुढील तपास इंदिरानगर पोलीस करत आहेत.