उपविभागीय अधिकाऱ्यांच्या आदेशावरून संगमनेरचा आठवडे बाजार या कारणासाठी शनिवारी बंद राहणार, मुख्याधिकाऱ्यांची माहिती

संगमनेर – 

कायदा व सुव्यवस्था राखण्यासाठी येत्या शनिवारी (६ सप्टेंबर) संगमनेरचा आठवडे बाजार बंद ठेवण्याचे आदेश प्रांताधिकारी अरुण उंडे यांनी पारित केले आहे. या आदेशावरून शनिवारी भरणारा आठवडे बाजार बंद ठेवण्यात येणार असल्याची माहिती नगरपरिषदेचे मुख्याधिकारी रामदास कोकरे यांनी एका प्रसिद्धी पत्रकाद्वारे दिली आहे.

अनंत चतुर्दशीच्या निमित्ताने शहरात निघणाऱ्या गणेश विसर्जन मिरवणुकीमुळे हा आठवडे बाजार शनिवारी एका दिवसासाठी बंद राहणार आहे. मानाच्या काही गणेश मंडळांच्या मिरवणुकीचा मार्ग हा बाजार भरणाऱ्या नेहरू चौकातून जात असल्याने हा निर्णय घेण्यात आला आहे.

शनिवारी गणेशोत्सवाच्या सांगतेचा दिवस असल्याने अनंत चतुर्दशीला शहरात मोठ्या प्रमाणावर गणेश विसर्जन मिरवणूक निघणार आहे. या मिरवणुकीदरम्यान कोणताही अनुचित प्रकार घडू नये, शांतता व सुव्यवस्था कायम राहावी यासाठी प्रशासनाने हा निर्णय घेतला आहे.

या दिवशी नियमितपणे भरणारा बाजार बंद राहणार असल्यामुळे नागरिकांनी याची नोंद घ्यावी आणि प्रशासनाला सहकार्य करावे, असे आवाहन मुख्याधिकारी रामदास कोकरे यांनी केले आहे.