माजी मंत्री थोरात यांच्या उपस्थितीत अमृत उद्योग समूहाच्या सहकारी संस्थांच्या वार्षिक सभा, शुक्रवारी मार्केट कमिटी व राजहंस दूध संघाची तर शनिवारी अमृतवाहिनी बँकेची; रविवारी थोरात सहकारी साखर कारखान्याची वार्षिक सर्वसाधारण सभा होणार

संगमनेर – 

सहकाराचे आदर्श मॉडेल म्हणून ओळखल्या जाणाऱ्या अमृत उद्योग समूहातील विविध सहकारी संस्थांच्या वार्षिक सर्वसाधारण सभा शुक्रवार, १२ सप्टेंबर ते रविवार, १४ सप्टेंबर २०२५ या काळात आयोजित करण्यात आल्या आहेत. या सभा काँग्रेसचे राष्ट्रीय वर्किंग कमिटीचे सदस्य, माजी मंत्री बाळासाहेब थोरात आणि माजी आमदार डॉ. सुधीर तांबे यांच्या प्रमुख उपस्थितीत होणार आहेत.

स्वातंत्र्यसेनानी सहकारमहर्षी भाऊसाहेब थोरात यांच्या विचारांवर आधारित या संस्थांनी संगमनेर तालुक्याच्या ग्रामीण विकासात महत्त्वाची भूमिका बजावली आहे. या संस्थांमुळे शेतकरी, उत्पादक, नागरिक, महिला, व्यापारी आणि कामगार अशा सर्वांचा विकास झाला असून तालुक्याची अर्थव्यवस्था मजबूत झाली आहे.

या सर्व सहकारी संस्थांच्या वार्षिक सर्वसाधारण सभा कारखाना कार्यस्थळावरील नवीन प्रशासकीय इमारतीसमोरील अमृतेश्वर मंदिराच्या प्रांगणात होणार आहेत.

अशा होतील सभा –

शुक्रवार, १२ सप्टेंबर २०२५: सकाळी ९ वाजता: संगमनेर सहकारी शेतकी संघाची वार्षिक सर्वसाधारण सभा. अध्यक्षस्थानी चेअरमन संपतराव डोंगरे.

* सकाळी १० वाजता: कृषी उत्पन्न बाजार समितीची वार्षिक सर्वसाधारण सभा. अध्यक्षस्थानी सभापती शंकरराव खेमनर.

* सकाळी ११ वाजता: संगमनेर तालुका सहकारी दूध उत्पादक संघाची (राजहंस दूध संघ) वार्षिक सर्वसाधारण सभा. अध्यक्षस्थानी चेअरमन रणजीतसिंह देशमुख.

शनिवार, १३ सप्टेंबर २०२५: सकाळी ९ वाजता: हरिश्चंद्र फेडरेशनची वार्षिक सर्वसाधारण सभा. अध्यक्षस्थानी राजेंद्र गुंजाळ.

* सकाळी १० वाजता: गरुड कुक्कुटपालन सहकारी संस्थेची वार्षिक सभा. अध्यक्षस्थानी राजेंद्र कडलग.

* सकाळी ११ वाजता: सहकारमहर्षी भाऊसाहेब थोरात अमृतवाहिनी सहकारी बँकेची वार्षिक सर्वसाधारण सभा. अध्यक्षस्थानी चेअरमन सुधाकर जोशी.

रविवार, १४ सप्टेंबर २०२५: दुपारी १ वाजता: सहकारमहर्षी भाऊसाहेब थोरात सहकारी साखर कारखान्याची वार्षिक सर्वसाधारण सभा. अध्यक्षस्थानी कारखान्याचे चेअरमन बाळासाहेब थोरात.

या सर्व सभांसाठी आमदार सत्यजित तांबे, युवक काँग्रेसच्या अध्यक्ष डॉ. जयश्रीताई थोरात, माधवराव कानवडे, बाजीराव खेमनर, दुर्गाताई तांबे, इंद्रजीत थोरात, रामहरी कातोरे, हौशीराम सोनवणे यांच्यासह अमृत उद्योग समूहातील सर्व संस्थांचे पदाधिकारी उपस्थित राहणार आहेत.

कारखान्याचे व्हाईस चेअरमन पांडुरंग पाटील घुले, दूध संघाचे व्हाईस चेअरमन राजेंद्र चकोर, बँकेचे व्हाईस चेअरमन ॲड. नानासाहेब शिंदे, शेतकी संघाचे व्हाईस चेअरमन सुनील कडलग, मार्केट कमिटीचे उपसभापती गीताराम गायकवाड आणि कारखान्याचे कार्यकारी संचालक जगन्नाथ घुगरकर यांच्यासह सर्व संस्थांच्या संचालक मंडळांनी सभासद आणि उत्पादकांना मोठ्या संख्येने उपस्थित राहण्याचे आवाहन केले आहे.