धार्मिक मिरवणुकीत स्वच्छतेचा नवा आदर्श: संगमनेरात तरुणांचा ‘झाडू’ सोबत प्रेरणादायी संदेश हजरत पैगंबर जयंतीनिमित्त एकता नगर सोशल ग्रुपचा उपक्रम; नागरिकांनी केले कौतुक

संगमनेर – मोहसीन शेख

धार्मिक उत्सव म्हटला की उत्साहाचे वातावरण असते, मात्र या उत्साहात सामाजिक जबाबदारीचा संदेश देणारी उदाहरणे क्वचितच पाहायला मिळतात. संगमनेर शहरात हजरत मोहम्मद पैगंबर यांच्या जयंतीनिमित्त काढण्यात आलेल्या मिरवणुकीत (जुलूस) असेच एक अनोखे दृश्य पाहायला मिळाले. येथील एकता नगर सोशल ग्रुपच्या तरुणांनी हातात पारंपरिक झेंडे किंवा बॅनर न घेता, ‘झाडू’ घेऊन मिरवणुकीच्या मागे स्वच्छतेची मोहीम राबवली. त्यांच्या या कृतीमुळे धार्मिक उत्सवाला एक नवी सामाजिक दिशा मिळाली आहे.

सोमवारी, (८ सप्टेंबर) नाईकवाडपुरा येथील जुम्मा मस्जिद येथून सुरू झालेली मिरवणूक शहराच्या प्रमुख रस्त्यांवरून पुढे जात होती. तरुणाईचा जोश आणि उत्साह यात भरलेला होता. मात्र, मिरवणूक पुढे सरकत असताना, एकता नगर सोशल ग्रुपचे सदस्य हातात झाडू घेऊन मिरवणुकीच्या मार्गावरची घाण आणि कचरा साफ करत होते. स्वच्छ संगमनेर – सुंदर संगमनेर असा नारा देत त्यांनी केवळ संदेशच दिला नाही, तर तो प्रत्यक्ष कृतीतून दाखवून दिला.

जुम्मा मस्जिदपासून सुरू झालेला हा जुलूस नाईकवाडपुरा, लखमीपुरा, देवी गल्ली, मोगलपुरा, सय्यद बाबा चौक, नाशिक रोड, मोमीनपुरा, नगरपालिका, रंगारगल्ली, गांधी चौक, तेली खुंट मार्गे पुन्हा मोगलपुरा येथे शांततेत पार पडला. मिरवणूक पार पडल्यानंतर मागे कोणताही कचरा किंवा घाण राहणार नाही याची काळजी या तरुणांनी घेतली.

या स्तुत्य उपक्रमात शेख जावेद गुलाम मोहम्मद, जावेद सादिक शेख, मोहसीन शेख, अफरोज पठाण, शाविद शेख, तौसिफ शेख, मुजू शेख, सहेबाज शेख, सरफराज पठाण, सलीम पठाण, आतिफ शेख, वसीम शेख, मुजाहिद पठाण, फिरोज पठाण, इमरान पठाण, नदीम सौदागर, सलमान शेख, बाबू शेख, साद शेख, नदीम तांबोळी, शकील शेख, अदनान सय्यद, शादाब शेख, मोबीन शेख, नियाज शेख, सोहेल शेख, इस्माईल शेख, फजील शेख, जीशान शेख, मुन्ना शेख, सलमान शेख, शाकीर शेख, समीर शेख, मोईश शेख, रमीज शेख, अझहर शेख, काशीब शेख, शाहिद शेख, साहिल शेख, फरीद सय्यद, हासिम शेख आदींसह अनेक कार्यकर्त्यांनी सहभाग घेतला.

धार्मिक परंपरेला सामाजिक स्वच्छतेची जोड देणाऱ्या या उपक्रमाचे सर्वसामान्य नागरिकांनी मनापासून कौतुक केले. मिरवणुकीनंतर अनेक ठिकाणी कचरा आणि अस्वच्छता राहते, मात्र संगमनेरमधील या तरुणांनी एक नवा आदर्श घालून दिला आहे, यामुळे मिरवणुकीतील हा उपक्रम शहरासाठी नक्कीच अनुकरणीय ठरला आहे.