दुर्दैवी घटना: होरपळून आजी आणि नातवाचा मृत्यू

संगमनेर – संगमनेर तालुक्यातील आश्वी जवळील खळी येथील कांगणवाडी येथे एका अत्यंत हृदयद्रावक घटनेत गरम पाणी अंगावर पडून भाजल्याने आजी आणि तिच्या पाच वर्षांच्या नातवाचा दुर्दैवी मृत्यू झाला आहे. या घटनेमुळे संपूर्ण परिसरात शोककळा पसरली असून, सोसे कुटुंबावर दुःखाचा डोंगर कोसळला आहे.

ही दुर्दैवी घटना ८ सप्टेंबर २०२५ रोजी पहाटेच्या सुमारास घडली होती. खळी कांगणवाडी येथील रहिवासी श्रीमती सिंधुबाई नामदेव सोसे (वय ५२) आणि तिचा नातू राहुल प्रकाश सोसे (वय ५) अंघोळीसाठी गरम केलेले पाणी वापरत असताना, ते अनावधानाने त्यांच्या अंगावर सांडले.

या अपघातात दोघेही गंभीररित्या भाजले. त्यांच्या शरीराचा सुमारे ६० टक्के भाग भाजला होता, विशेषतः पाठीचा मागील भाग आणि पाय अधिक प्रमाणात भाजले होते. घटनेचे गांभीर्य लक्षात घेऊन, कुटुंबियांनी त्यांना तात्काळ उपचारासाठी लोणीच्या प्रवरा ग्रामीण रुग्णालयात दाखल केले होते.

प्रवरा रुग्णालयात गेले काही दिवस दोघेही मृत्यूशी झुंज देत होते. मात्र, उपचारादरम्यान त्यांना यश आले नाही. १५ सप्टेंबर रोजी आजी सिंधुबाई सोसे यांचे निधन झाले. त्यानंतर मंगळवार, २३ सप्टेंबर रोजी नातू राहुलनेही जगाचा निरोप घेतला. एकाच कुटुंबातील दोन व्यक्तींचा अशाप्रकारे दुर्दैवी अंत झाल्याने सोसे कुटुंबाला आणि खळी गावाला मोठा धक्का बसला आहे.

सोसे कुटुंब हे अत्यंत साधे, कष्टकरी आणि मनमिळाऊ म्हणून ओळखले जाते. या कठीण काळात कांगणवाडीतील सर्व ग्रामस्थांनी सोसे कुटुंबियांच्या दुःखात सहभागी होत त्यांना धीर दिला. आजच्या काळात माणुसकी अजूनही जिवंत आहे, याचा अनुभव या घटनेतून आला, असे स्थानिकांनी सांगितले.

या दुर्दैवी घटनेने पंचक्रोशीतील सर्व नागरिक आणि नातेवाईक हळहळले असून, सर्वत्र शोक व्यक्त होत आहे. सिंधुबाई सोसे यांच्या पश्चात पती नामदेव सोसे, दोन मुलगे, दोन सुना, दोन मुली आणि नातवंडे असा मोठा परिवार आहे, तर नातू राहुलच्या पश्चात आई-वडील आणि एक लहान बहीण असा परिवार आहे.