संगमनेर | प्रतिनिधी
दैनिक ‘प्रवरातीर’ परिवारातील मुख्य आधारस्तंभ आणि संस्थापक संपादक शिवपालसिंह ठाकूर यांच्या पत्नी व संपादक धीरज ठाकूर यांच्या मातोश्री अनिता शिवपालसिंह ठाकूर (वय ५५) यांचे आज सोमवारी (२३ मार्च) पहाटे चार वाजेच्या सुमारास अल्पशा आजाराने दुःखद निधन झाले. त्यांच्या निधनामुळे संगमनेर शहरासह माध्यम क्षेत्रात मोठी हळहळ व्यक्त होत आहे.
मिळालेल्या माहितीनुसार, अनिता ठाकूर या गेल्या काही दिवसांपासून आजारी होत्या. त्यांच्यावर स्थानिक रुग्णालयात उपचार सुरू होते. मात्र, उपचारादरम्यान आज पहाटे त्यांची प्राणज्योत मालवली. त्यांच्या जाण्याने ठाकूर परिवाराचा मुख्य आधार हरपल्याची भावना व्यक्त केली जात आहे.
श्रीमती अनिता ठाकूर या अत्यंत मनमिळावू, प्रेमळ आणि सात्विक स्वभावाच्या होत्या. ‘प्रवरातीर’च्या जडणघडणीत आणि कौटुंबिक प्रवासात त्यांनी शिवपालसिंह ठाकूर यांना मोलाची साथ दिली. ठाकूर कुटुंबातील त्या एक प्रेमळ माऊली आणि मार्गदर्शक म्हणून सर्वांना परिचित होत्या. त्यांच्या निधनाचे वृत्त समजताच संगमनेर परिसरातील राजकीय, सामाजिक आणि पत्रकारिता क्षेत्रातील मान्यवरांनी शोक व्यक्त केला आहे.
आज दुपारी अंत्यसंस्कार – अनिता ठाकूर यांच्या पार्थिवावर आज सोमवारी (२३ मार्च) दुपारी ३:०० वाजता संगमनेर येथील प्रवरामाई अमरधाम येथे अंत्यसंस्कार करण्यात येणार आहेत. त्यांच्या पश्चात पती शिवपालसिंह ठाकूर, चिरंजीव तथा संपादक धीरज ठाकूर, सून, मुली, जावई आणि नातवंडे असा मोठा परिवार आहे.🌟 दैनिक ‘प्रवरातीर’च्या माध्यमातून जनसेवा करणाऱ्या ठाकूर कुटुंबावर आलेला हा प्रसंग अत्यंत कठीण आहे. अनिता ठाकूर यांना ‘महाराष्ट्र संवाद न्यूज’कडून भावपूर्ण श्रद्धांजली!
