अवैध बांधकाम प्रकरणी अनिकेत इथापेंवर दोन आठवड्यांनंतरही गुन्हा दाखल नाही; संगमनेर नगरपालिकेच्या पत्राकडे पोलिसांचे दुर्लक्ष

महाराष्ट्र संवाद न्यूज ऑनलाईन
संगमनेर:
संगमनेर नगरपालिकेच्या हद्दीतील सुकेवाडी रोड येथे अनिकेत अशोक इथापे यांनी पालिकेची कोणतीही परवानगी न घेता आणि प्रशासनाने नोटीस बजावूनही बेकायदेशीरपणे पाच मजली (जी प्लस फोर) इमारतीचे बांधकाम केले आहे. या धोकादायक अवैध बांधकामामुळे सर्वसामान्य नागरिकांच्या जीवितास हानी पोहोचण्याची दाट शक्यता निर्माण झाली असून, या प्रकरणी इथापे यांच्यावर गुन्हा दाखल करावा यासाठी मुख्याधिकाऱ्यांनी पोलिसांना दोन पत्रे देऊन दोन आठवडे उलटले आहेत, तरीही अद्याप संगमनेर शहर पोलिसांत कोणताही गुन्हा दाखल झालेला नसल्याची माहिती समोर आली आहे.
नगरपालिका प्रशासनाने संगमनेर शहर पोलिसांना दिलेल्या पत्रात स्पष्ट केले आहे की, अनिकेत अशोक इथापे यांनी सर्वे नंबर १५३/१/१ येथील जागेवर कोणत्याही पूर्वपरवानगीशिवाय हे अनधिकृत बांधकाम केले आहे. या संदर्भात महाराष्ट्र प्रादेशिक व नगररचना अधिनियम, १९६६ च्या कलम ५४ अन्वये सदर बांधकाम तात्काळ स्थगित करण्यासाठी आणि अनधिकृत हिस्सा काढून घेण्यासाठी नोटीस बजावण्यात आली होती. परंतु, या नोटीसची दखल न घेता बांधकाम सातत्याने सुरूच ठेवण्यात आले.
स्थानिक नागरिकांच्या तक्रारीवरून ५ जून २०२६ रोजी पालिकेच्या पथकाने प्रत्यक्ष जागेवर जाऊन पाहणी केली असता, पाचव्या मजल्यावर ब्लॉक बसवण्याचे काम वेगात सुरू असल्याचे दिसून आले. या बांधकामाचे सिमेंट ब्लॉक शेजारील आयुब मणियार यांच्या इमारतीवर, त्यांच्या अंगणात आणि पश्चिम बाजूच्या सार्वजनिक रस्त्यावर पडलेले आढळून आले. यामुळे परिसरात गंभीर अपघाताची आणि जीवितहानीची स्थिती निर्माण झाली आहे. या गंभीर प्रकरणी कायदेशीर गुन्हा दाखल करण्यासाठी मुख्याधिकाऱ्यांच्या वतीने रचना सहाय्यक वैष्णवी गडाख आणि सहाय्यक नगररचनाकार (प्रभारी) ओंकार सहाणे यांना प्राधिकृत करण्यात आले आहे.
सध्या संगमनेर शहराच्या विकास आणि सुशोभीकरणासाठी नगराध्यक्षांनी अतिक्रमण आणि बेकायदेशीर कामांविरोधात मोहीम हाती घेतली असून, त्याची सुरुवात या इथापे प्रकरणापासून झाली आहे. या मोहिमेअंतर्गत बस स्थानक ते बी.एड. कॉलेज रोडवरील भाजीपाला विक्रेत्यांना हटवण्यात आले असून, पुढील कारवाई बस स्थानक परिसर आणि नवीन नगर रोडवर केली जाणार आहे. मात्र, पालिकेने पत्र देऊनही पोलिसांकडून गुन्हा दाखल करण्यास होणाऱ्या विलंबाबद्दल आश्चर्य व्यक्त होत असून, शहरातील इतर भागांतील अतिक्रमण धारक, नियमबाह्य हॉस्पिटल्स आणि पार्किंग नसलेल्या बड्या मंडळींवर नगरपालिका आता कशी कारवाई करणार, याकडे सर्वांचे लक्ष लागले आहे.