मेडिकलवर एलसीबीचा छापा; नशेच्या इंजेक्शनच्या ४० सीलबंद बाटल्या जप्त, ३१,३७० रुपयांचा मुद्देमाल हस्तगत

महाराष्ट्र संवाद न्यूज ऑनलाईन – 

अवैधरित्या नशेचे इंजेक्शन, बाटल्या विकणाऱ्या औषध विक्रेत्यावर अहिल्यानगरच्या स्थानिक गुन्हे शाखेने मोठी कारवाई केली आहे. श्रीरामपूर शहरातील खंडाळा शिवारातील ‘शिव मेडिकल’वर छापा टाकून पोलिसांनी एकूण ३१,३७०/- किमतीचा मुद्देमाल जप्त केला आहे.

प्राप्त झालेल्या माहितीनुसार, खंडाळा शिवारातील ‘शिव मेडिकल’चा मालक पंकज चव्हाण (वय २१, रा. खंडाळा, ता. श्रीरामपूर) हा नशेकरीता वापरल्या जाणाऱ्या बाटल्यांची विक्री करत असल्याची गुप्त माहिती स्थानिक गुन्हे शाखेच्या पथकाला मिळाली. माहितीची खातरजमा करण्यासाठी पोलीस उपनिरीक्षक दीपक मेढे यांच्या पथकाने औषध निरीक्षक सोमनाथ मुळे यांना बोलावून घेतले आणि एक डमी ग्राहक तयार करून ‘शिव मेडिकल’मध्ये पाठवले.

डमी ग्राहकाला मेडिकलच्या मालकाने नशेच्या बाटलीचा बॉक्स दिल्यानंतर, पोलीस पथक आणि औषध निरीक्षक यांनी तात्काळ मेडिकलवर छापा टाकला. मेडिकल मालक पंकज राजकुमार चव्हाण याला ताब्यात घेऊन त्याची आणि मेडिकलची झडती घेतली असता, तेथून नशेकरीता वापरल्या जाणाऱ्या ४० सीलबंद बाटल्या संबंधित विक्रीचा मुद्देमाल आणि रोख रक्कम असा एकूण ३१,३७०/- रुपये किमतीचा माल जप्त करण्यात आला.

याप्रकरणी स्थानिक गुन्हे शाखेचे पोलीस कॉन्स्टेबल रमीझराजा रफीक आतार यांच्या फिर्यादीवरून श्रीरामपूर शहर पोलीस स्टेशनमध्ये गु. र. नं. ९१४/२०२५ नुसार भारतीय न्याय संहिता २०२३ चे कलम १२३, १२५, २७८ प्रमाणे गुन्हा दाखल करण्यात आला आहे. पुढील तपास श्रीरामपूर शहर पोलीस स्टेशन करत आहे. पोलीस अधीक्षक सोमनाथ घार्गे यांच्या मार्गदर्शनाखाली स्थानिक गुन्हे शाखेच्या पथकाने ही यशस्वी कारवाई केली.