श्रीरामपूर – श्रीरामपूरच्या स्थानिक राजकारणात मोठा राजकीय ‘बदल’ झाला आहे. भारतीय जनता पक्षाचे प्रभावी आणि हिंदुत्ववादी विचारसरणीचे ज्येष्ठ नेते प्रकाश चित्ते यांनी कार्यकर्त्यांसह मुख्यमंत्री एकनाथ शिंदे यांच्या नेतृत्वाखालील शिवसेनेत (शिंदे गट) प्रवेश केला आहे. मुंबईत मुख्यमंत्री शिंदे यांच्या उपस्थितीत हा प्रवेश सोहळा पार पडला.
या प्रवेशामुळे श्रीरामपूर नगरपालिका निवडणुकीचे संपूर्ण राजकीय समीकरण बदलण्याची शक्यता आहे. भाजपमध्ये ओबीसी सेलचे माजी उपाध्यक्ष राहिलेले प्रकाश चित्ते यांच्यामुळे शिंदे गटाला शहरातील ओबीसी मतदारांचा आणि हिंदुत्ववादी संघटनांचा मजबूत आधार मिळेल.
सूत्रांनुसार, आगामी नगरपरिषद निवडणुकीत शिंदे गट भाजपसोबत युती न करता माजी आमदार भानुदास मुरकुटे यांच्या मार्गदर्शनाखाली स्वतंत्र पॅनल उभे करण्याच्या तयारीत आहे. या पॅनलमध्ये नगराध्यक्षपदासाठी प्रकाश चित्ते यांचे नाव प्रमुख दावेदार म्हणून समोर आले आहे, यामुळे शहरातील राजकीय वर्तुळात मोठी खळबळ माजली आहे. भाजपच्या गोटात यामुळे अस्वस्थता निर्माण झाली आहे.
दरम्यान, श्रीराम सेवा संघाचे संस्थापक सागर बेग हे देखील शिंदे गटात असले तरी, चित्ते आणि बेग हे हिंदुत्ववादी संघटनांमध्ये कट्टर विरोधक म्हणून ओळखले जातात. त्यामुळे आता हे दोन्ही नेते एकत्र काम करणार का, की अंतर्गत मतभेद उफाळून येणार, हा प्रश्न चर्चेचा विषय ठरला आहे. मात्र, शिंदे गटाचे कार्यकर्ते दोन्ही नेत्यांमध्ये समन्वय साधून निवडणूक लढवण्याच्या प्रयत्नात आहेत.
चित्ते यांच्या प्रवेशानंतर शिंदे गट स्थानिक पातळीवर निर्णायक ताकद म्हणून उदयास येत आहे. त्यांच्या प्रवेशामुळे भाजपचे ओबीसी मतदार मोठ्या प्रमाणावर शिंदे गटाकडे वळू शकतात, यामुळे आगामी निवडणूक अधिक चुरशीची होईल. शिंदे गट नगराध्यक्षपदासाठी चित्ते यांचे नाव अधिकृतपणे जाहीर करण्याची शक्यता जवळपास निश्चित मानली जात आहे. श्रीरामपूरचे राजकारण आता नव्या आणि अनिश्चित वळणावर आले आहे.
राजकारणाचे नवे वळण: प्रकाश चित्ते यांच्या शिंदे गटातील प्रवेशाने भाजप अस्वस्थ; नगराध्यक्षपदासाठी ‘चित्ते’ शर्यतीत!
नगराध्यक्षपदासाठी प्रकाश चित्ते यांचे नाव प्रमुख दावेदार म्हणून समोर आले आहे, यामुळे शहरातील राजकीय वर्तुळात मोठी खळबळ माजली आहे. भाजपच्या गोटात यामुळे अस्वस्थता निर्माण झाली आहे.
