संगमनेर – संगमनेर तालुक्यातील नाभिक समाजाची अनेक दिवसांपासूनची ‘सभागृहाची’ मागणी आता पूर्णत्वास आली आहे. आमदार सत्यजीत तांबे यांनी केलेल्या अथक पाठपुराव्यामुळे अखेर नाभिक समाजाच्या सभागृह बांधकामासाठी १० लाख रुपयांचा महत्त्वपूर्ण निधी मंजूर झाला आहे, याशिवाय राहुरीच्या टाकळीमिया येथील विद्यावर्धिनी ग्रामीण शिक्षण संस्थेला स्कूलबस खरेदी करण्यासाठी देखील वीस लाख रुपयांचा निधी मंजूर करण्यात आला आहे, अशी माहिती आमदार सत्यजित तांबे यांनी दिली. समाजाच्या प्रगतीसाठी अत्यंत महत्त्वाच्या असलेल्या या निर्णयामुळे नाभिक समाजात आनंदाचे वातावरण आहे.
संगमनेर तालुक्यातील नाभिक समाज हा आपल्या मेहनती आणि सामाजिक सक्रियतेमुळे ओळखला जातो. समाजाच्या या मूलभूत गरजेची जाणीव ठेवून आमदार तांबे यांनी निधी मंजुरीसाठी शासनाकडे सातत्याने पाठपुरावा केला होता. त्यांच्या सातत्यपूर्ण प्रयत्नांना अखेर यश मिळाले असून १० लाख रुपयांचा निधी सभागृह बांधकामासाठी मंजूर करण्यात आला आहे.
या निधीतून साकारणारे सभागृह नाभिक समाजासाठी एक महत्त्वाचा आधार ठरणार आहे. समाजाच्या विविध सामाजिक, शैक्षणिक, सांस्कृतिक आणि धार्मिक उपक्रमांसाठी एक सशक्त आणि सुसज्ज मंच या माध्यमातून उपलब्ध होईल. या सभागृहाचा उपयोग प्रामुख्याने युवकांसाठी मार्गदर्शन शिबिरे, करिअर कार्यशाळा, महिला मंडळांचे कार्यक्रम आणि बचत गटांच्या बैठका, सांस्कृतिक परंपरा, सण-उत्सव जोपासण्यासाठी व्यासपीठ तसेच शैक्षणिक आणि सामाजिक बैठकांचे आयोजन करण्यासाठी होणार आहे.
या निर्णयामुळे समाजाच्या विकासाला नवी दिशा मिळेल आणि सामुदायिक उपक्रम अधिक प्रभावीपणे राबवता येतील, असा विश्वास व्यक्त करण्यात येत आहे. निधी मंजूर झाल्याबद्दल संगमनेर तालुक्यातील नाभिक समाजाने आमदार सत्यजीत तांबे यांचे आभार मानले आहेत.
‘सभागृहा’ची प्रतीक्षा संपली! आमदार सत्यजीत तांबेंमुळे संगमनेरच्या नाभिक समाजाला १० लाखांचा निधी मंजूर
याशिवाय राहुरीच्या टाकळीमिया येथील विद्यावर्धिनी ग्रामीण शिक्षण संस्थेला स्कूलबस खरेदी करण्यासाठी देखील वीस लाख रुपयांचा निधी मंजूर करण्यात आला आहे,
