गिरीजा पिचड यांचा काँग्रेस पक्षात प्रवेश; आदिवासी समाजाला नवा चेहरा, जिल्हा परिषदेसाठी मिळणार बळ

मुंबई: ज्येष्ठ नेते व माजी मंत्री मधुकरराव पिचड यांची नात आणि माजी आमदार वैभव पिचड यांच्या पुतणी सौ. गिरीजा पिचड-म्हात्रे यांनी आज काँग्रेस पक्षात प्रवेश केला. महाराष्ट्र काँग्रेसचे प्रदेशाध्यक्ष हर्षवर्धन सपकाळ आणि काँग्रेस वर्किंग कमिटीचे सदस्य लोकनेते बाळासाहेब थोरात यांच्या उपस्थितीत हा प्रवेश सोहळा पार पडला.
काँग्रेस पक्षाची विचारधारा मान्य करून गिरीजा पिचड यांनी पक्षात प्रवेश केला, यावेळी सपकाळ आणि थोरात यांनी त्यांचे पुष्पगुच्छ देऊन स्वागत केले.
यावेळी बोलताना प्रदेशाध्यक्ष हर्षवर्धन सपकाळ यांनी गिरीजा पिचड यांच्या पक्षप्रवेशामुळे आदिवासी समाजाला एक नवे आणि सक्षम नेतृत्व मिळाल्याचे मत व्यक्त केले. त्या आदिवासी समाजाच्या न्याय-हक्काची लढाई लढतील, असा विश्वासही त्यांनी व्यक्त केला.
माजी महसूलमंत्री बाळासाहेब थोरात यांनी गिरीजा पिचड यांच्या रूपाने काँग्रेस परिवारात एका तरुण आणि महत्त्वाकांक्षी नेतृत्वाचे स्वागत केले. त्यांच्या प्रवेशामुळे अहिल्यानगर जिल्ह्यातील काँग्रेसचे संघटन अधिक मजबूत होईल, असा विश्वास व्यक्त केला.
विशेष म्हणजे, गिरीजा पिचड यांच्या पक्षप्रवेशामुळे काँग्रेस पक्षाला अहिल्यानगर जिल्हा परिषद अध्यक्षपदासाठी एक प्रभावी आणि सक्षम चेहरा मिळाला असल्याची चर्चा राजकीय वर्तुळात सुरू झाली आहे. स्व. मधुकरराव पिचड साहेब यांचा मोठा राजकीय वारसा त्या पुढे घेऊन जातील, अशी अपेक्षा व्यक्त होत आहे.